بڕی قەرزە وەرنەگیراوەكانی دانەغاز‏ لای هەرێم لەسەدا 136 زیادیكردووە

پەیام   

قەرزەكانی دانەغاز‏ لەسەر حكومەتی ماوەبەسەرچووی هەرێمی كوردستان بۆ 189 ملیۆن دۆلار بەرزبووەوە و بەراورد بە كۆتایی ساڵی ڕابردوو زیاترلە سەدا 136 زیادیكردووە.
كۆمپانیای دانەغاز‏ی ئیماراتی ڕایگەیاند، بڕی پارەی وەرنەگیراوی كۆمپانیاكە لای حكومەتی ماوەبەسەرچووی هەرێمی كوردستان تا كۆتایی ئەیلوولی 2026 ‏گەیشتووەتە 189 ملیۆن دۆلار، لەكاتێكدا كۆتایی ساڵی رابردوو 80 ملیۆن دۆلار بووە، بەپێی ڕاپۆرتە داراییەكان، ئەم بڕەیە بەراورد بە كۆتایی ساڵی ڕابردوو بە ڕێژەی 136% زیادی ‏كردووە.

ئەمەش لەكاتێكدایە بەرهەمهێنانی گازی كێڵگەی كۆرمۆر 18% زیادی كردووە و پڕۆژەی فراوانكردنی كەی ئێم 250 تەواو بووە، ‏دانەغاز‏ تەنها 156 ملیۆن دۆلاری لە هەرێم وەرگرتووە.
بەپێی ڕاپۆرتێكی دانەغاز لەو بڕە پارەیەی وەرنەگیراوە، 48 ملیۆن دۆلاری پەیوەندیی بە ناكۆكییەكیی ‏ژمێریارییەوە هەیە كە حكومەت هێشتا پێداچوونەوەی بۆ دەكات.
كۆمپانیاكە لە سەرەتای تشرینی دووەمەوە دەستی بە ڕادەستكردنی غاز بۆ كەركووك كردووەتەوە. ‏سەرەڕای كێشە داراییەكانیش، قازانجی پوختی دانەغاز‏ لەم ساڵەدا گەیشتووەتە 152 ملیۆن دۆلار و بەردەوامە لە گفتوگۆ بۆ وەرگرتنی ‏شایستە داراییەكان و پەرەپێدانی كێڵگەی چەمچەماڵ.