مۆسکۆ: سیاسەتی دەستدرێژیکارانە شکستی هێنا و ڕۆڵمان هەبوو لە ئارامیی ناوچەکەدا

ماریا زاخارۆڤا، وتەبێژی وەزارەتی دەرەوەی ڕووسیا، جەخت لە سەرکەوتنی وڵاتەکەی دەکاتەوە لە ڕێگریگرتن لە بەکارهێنانی ئەنجومەنی ئاسایش بۆ مەرامی خراپ و دەڵێت: "مۆسکۆ بەشداربووە لە بەدیهێنانی سازانێکی نێودەوڵەتی لەسەر بنەمای یاسا و بەرژەوەندییە مرۆییەکان. " شکستی سیاسەتی گرژی و دەستوەردان. 

لە نوێترین لێدوانیدا سەبارەت بە گۆڕانکارییەکانی ناوچەکە، ماریا زاخارۆڤا ڕایگەیاند کە ئەو سیاسەتە شەڕانگێز و دەستدرێژیکارانەی هەندێک لایەن پەیڕەویان دەکرد، تووشی شکستی گەورە بووە. ئاماژەی بەوەش کرد کە ڕووسیا هەمیشە هەوڵیداوە ململانێکان لە چوارچێوەی دیپلۆماسی و عەقڵانیدا بمێننەوە. 

زاخارۆڤا ئاماژەی بەوە کرد کە وڵاتەکەی هاوکار و بەشدارێکی سەرەکی بووە لە گەیشتن بە ڕێککەوتن و چارەسەری گونجاو بۆ کێشەکانی ڕۆژهەڵاتی ناوەڕاست. ئەو جەختی کردەوە کە ئەم هەوڵانەی مۆسکۆ تەنها بۆ بەرژەوەندییەکی کاتی نەبووە، بەڵکو پاڵپشت بە یاسا نێودەوڵەتییەکان، پاراستنی بەرژەوەندییە نەتەوەییەکان و لەبەرچاوگرتنی ڕەهەندی مرۆیی ئەنجام دراون. 

لە بەشێکی تری قسەکانیدا، وتەبێژی وەزارەتی دەرەوەی ڕووسیا تیشکی خستە سەر هەڵوێستی وڵاتەکەی سەبارەت بە گەرووی هورمز و ڕایگەیاند: ڕەتکردنەوەی بڕیارنامەی ئەنجومەنی ئاسایش لەلایەن ڕووسیاوە سەبارەت بەو ناوچەیە، هەنگاوێکی ستراتیژی بووە.