10/04/2026
342 جار خوێنراوەتەوە
ئەمریكا بە توندی هۆشداری دایە بەغداد و باڵیۆزی عێراقیشی بانگهێشت كرد
پەیام
پاش ئەوەی دیپلۆماتكارەكانیان لە بۆسەیەكی چەكداریدا لە بەغدا كرانە ئامانج، وەزارەتی دەرەوەی ئەمریكا بە توندی هۆشداری دەداتە بەغدا و باڵیۆزی عێراقی بانگهێشت كرد.
تۆمی پیگۆت، جێگری وتەبێژی وەزارەتی دەرەوەی ئەمریكا ئەمڕۆ هەینی ڕایگەیاند، جێگری وەزیری دەرەوە بانگهێشتی نزار خەیروڵڵا، باڵیۆزی عێراقی لە واشنتۆن كردووە بۆ ئەوەی سەركۆنەی توندی واشنتۆنی پێ بگەیەنێت بەرانبەر ئەو هێرشانەی كە میلیشیا نزیكەكان لە ئێران ئەنجامی دەدەن.
لە ڕاگەیەنراوەكەدا هاتووە، جێگری وەزیر ئەو هێرشەی سەر دیپلۆماتكاران كە چوارشەممەی ڕابردوو ڕوویدا، بە شكستی حكومەتی عێراق ناو برد لە پاراستنی میوانەكانی، بەتایبەت كە سەدان هێرشی دیكە كراونەتە سەر هاووڵاتییان و بەرژەوەندییە بازرگانییەكانیان لە عێراق و هەرێمی كوردستان.
واشنتۆن ڕەخنەی توندی لە هەندێك لایەنی ناو حكومەتی عێراق گرت، كە پاڵپشتیی سیاسی و دارایی ئەو گرووپانە دەكەن، ڕاشیگەیاند: ئەمریكا هیچ لێبووردەییەكی نابێت و چاوەڕێ دەكات بەغدا دەستبەجێ ئەو میلیشیایانە هەڵبوەشێنێتەوە.
ئەم بانگهێشتكردنە لە كاتێكدایە كە تەنیا هەفتەی ڕابردوو، ئەمریكا پاداشتێكی (3) ملیۆن دۆلاریی ڕاگەیاند بۆ هەر كەسێك زانیاری لەسەر ئەو گرووپانە بدات كە هێرش دەكەنە سەر دامەزراوە دیپلۆماسییەكانی لە عێراق.
لە تۆڕە کۆمەڵایەتیەکان شەیری بکە