چین: گەمارۆدانی بەندەرەکانی ئێران لە لایەن ئەمریکاوە هەنگاوێکی مەترسیدارە

وەزارەتی دەرەوەی چین هۆشداری دەدات کە گەمارۆدانی بەندەرەکانی ئێران لە لایەن ئەمریکاوە هەنگاوێکی "مەترسیدارە"، ئێرانیش  بە هێرش بۆ سەر ئابووریی جیهان وەسفی دەکات. 
وەزارەتی دەرەوەی چین ڕایگەیاند گەمارۆدانی بەندەرەکانی ئێران و زیادکردنی جووڵە سەربازییەکانی ئەمریکا، تەنیا دەبنە هۆی ئاگرخۆشکردنی زیاتری گرژییەکان لە ناوچەکەدا، هەروەها ئەم هەنگاوەی واشنتۆنی بە کارێکی "مەترسیدار و نابەرپرسانە" ناوزەند کرد. 
هاوکات شی جین پینگ، سەرۆککۆماری چین، داوای کرد کە سەروەریی خاکی وڵاتانی ڕۆژهەڵاتی ناوەڕاست بە تەواوی ڕێزی لێ بگیرێت و ڕێگری بکرێت لە هەر پەرەسەندنێکی سەربازی کە سەقامگیریی ناوچەکە تێکدەدات. 
لەلایەکی دیکەوە، ئیسماعیل بەقایی، وتەبێژی وەزارەتی دەرەوەی ئێران، لە وەڵامی هەڕەشەکانی دۆناڵد ترەمپدا، ڕایگەیاند: "ئایا دەکرێت لە جەنگێکی نایاساییدا و لە ڕێگەی هێرشێکی تۆڵەسەندانە بۆ سەر ئابووریی جیهانی سەرکەوتن بەدەست بهێنرێت؟ " بەقایی ئاماژەی پێ کرد کە ئەم ڕەفتارەی واشنتۆن هاوشێوەی "بڕینی لووتی خۆتە لە توڕەیدا، جەختیشی کردەوە کە تێکدانی بازاڕی وزە و ئابووریی جیهانی لە پێناو مەرامی سیاسی، زیانی گەورە بە هەموو لایەک دەگەیەنێت نەک تەنیا تاران.