لە هێرشەکانى ئەمڕۆدا بۆ سەر لوبنان 23 كەس كوژران كە 12 یان ئەندامی تیمی پزیشكین

پەیام

سوپای زایۆنی بەردەوامە لە بۆردومانكردنی ناوچە جیاجیاكانی لوبنان و لە ئاكامدا دەیان هاووڵاتی دیكە كوژراون و بریندار بوون.

لە ئاكامی هێرشەكانی سوپای زایۆنی بۆ سەر ناوچە جیاجیاكانی لوبنان لە بەرەبەیانی ئەمڕۆدا 23 كەس كوژران كە 12 یان ئەندامی تیمی پزیشكی بوون.

ئاژانسی هەواڵی فەڕمیی لوبنان بڵاوی كردەوە لە نوێترین هێرشی سوپای زایۆنی بۆردومانی شوقەیەك لە ناوچەی حارە سەیدا لە باشووری لوبنان كراوە و 4 كەس كوژراون.

لە پارێزگای نەبتیە لە باشووری لوبنان بەهۆی بۆردومان كرنی سەنتەرێكی تەندروستی لە قەزای بنت جوبەیل 12 كەس لە تیمی پزیشكی لە پزیشك و كارمەندی تەندروستی و پەرستار كوژران و لە هێرشێكدا لەحەی ڕاهیبات 7 كەس كوژراون و ژمارەیەكی تریش بریندار بوون.

بەپێی ئاماری وەزارەتی تەندروستی لوبنان كۆی قوربانیانی هێرشەكانی سوپای زایۆنی تاوەكو ئێوارەی هەینی گەیشتووەتە 773 كوژراو كە 103 یان منداڵن و برینداربوونی 1933 كەس كە 326 منداڵیان تێدایە.