ماكرۆن داوا لە ئێران دەكات گەرەنتی لە ئاشتییبوونی بەرنامە ئەتۆمییەكەی بدات

پەیام 

سەرۆكی فەڕەنسا داوا لە ئێران دەكات گەرەنتیی لە ئاشتییانەبوونی بەرنامە ئەتۆمییەكەی بدات، هاوتا ئێرانییەكەیشی دەڵێ: ئێمە هەمیشە بۆ گەرەنتی ئامادەین.

لە ڕاگەیەنراوێكدا، سەرۆكایەتی فەڕەنسا ئاشكرای كرد "ئیمانوێڵ ماكرۆن پەیوەندییەكی تەلەفونی لەگەڵ مەسعود پزیشكیان سەرۆكی ئێران ئەنجام داوە" و تێیدا داوای كردووە "تاران گەرەنتیی پێویست بدات كە بەرنامە ئەتۆمییەكەی بۆ ئاشتی بەكار دەهێنێت".

بەپێی ڕاگەیەنراوەكە ماكرۆن بە پزیشكیان ڕاگەیاندووە: پاریس بە هەموو شێوەیەك بوونی تاران بە خاوەنی چەكی ئەتۆمی ڕەت دەكاتەوە، چونكە هەڕەشەی ڕاستەوخۆ لە ئاسایشی هەرێمی و نێودەوڵەتی دەكات، بەڵام پێویستە بە ڕێی دیبلۆماسی و دانوستان بەری پێ بگیرێت.

سەرۆكی فەڕەنسا بەڵێنی بە هاوتا ئێرانییەكەی داوە "پاریس و هاوبەشە ئەورووپییەكانی كار لەسەر خێراكردنی دانوستانەكان دەكەن".

لای خۆیەوە و لەو پەیوەندییەدا، مەسعود پزیشكیان سەرۆككۆماری ئێران وتویەتی: تاران هەمیشە بۆ گەرەنتی و دروستكردنی متمانە سەبارەت بە چالاكییە ئەتۆمییەكانی لە چوارچێوەی یاسا نێودەوڵەتییەكان ئامادەیە.

پزیشكیان وتوشیەتی: وەڵامی ئێمە بۆ قەوارەی زایۆنی تووندتر و یەكلاكەرەوەتر دەبێت.