ئەمریكا هەرسێ بنكەی فۆردۆ، ئەسفەهان نەتەنزی ئەتۆمی لە ناو خاكی ئێران بۆردومان كرد

پەیام

بەرەبەیانی ئەمڕۆ سوپای ئەمریكا بۆردومانی بنكەی فۆردۆ و دوو بنكەی دیكەی ئەتۆمیی ئێرانی كرد و سەرۆكی ئەو وڵاتەش دەڵێت: كۆتاییمان بە بەرنامە ئەتۆمیەكەی ئێران هێنا.

تۆڕی، (ئێن بی سی) ئەمریكی ئاشكرای كرد، "هێزی دەریایی ئەمریكا لە ڕێی ژێرئاوگەرەكانیەوە بە 30 مووشەكی تۆماهۆك چەند ئامانجێكی لە نێو خاكی ئێران بۆردومان كردووە كە بریتی بوون لە هەردوو دامەزراوەی نەتەنز و ئەسفەهان".

ئێن بی سی ڕایشیگەیاندووە: فڕۆكە جەنگی "بی توو"ش،  12 موشەكی وێرانكەری شوێنە قایمەكانی بۆ سەر بنكەی ئەتۆمی فۆردۆ بەر داوەتەوە".

ژمارەیەك سەرچاوە و تۆڕی هەواڵی ئەمریكی و جیهانیش لەوانە فۆكس نیوز، نیویۆرك تایمز و ڕۆیتەرز ئاشكرایان كرد كە "دەروازەی هەر دوو دامەزراوەی فۆردۆ بە دوو بۆمب بۆردومان كراون، شەش بۆمبی وێرانكەر لە بۆردومان سەر دامەزراوەی فۆردۆ بەكار هێنراون، هێرشەكانی دیكە بە مووشەكی تۆماهۆك ئەنجام دراون".

بەپێی ئەوەی فۆكس نیوز لە سەرچاوەیەكەوە بڵاوی كردووەتەوە "دامەزراوەكانی نەتەنز و ئەسفەهان بە ڕێژەی 75% وێران بوون".

ئاژانسی ڕۆیتەرز و ڕۆژنامەی نیویۆرك تایمزیش ڕایانگەیاند: فڕۆكەی بی دوو لە هێرشی سەر دامەزراوە ئەتۆمییەكانی ئێران، بەتایبەت دامەزراوەی فۆردۆ بەكار هاتوون.

لای خۆیەوە و لەدوای هێرشەكە دۆناڵد تڕەمپ سەرۆكی ئەمریكا ڕایگەیاند: لە ئەنجامی ئەو هێرشە دامەزراوە گرنگەكانی ئێران بۆ پیتاندنی یۆرانیۆم بە تەواوی لەنێو براون.

ترەمپ ئاماژەی بەوەش كرد "لە هێرشەكەی سەر ئێراندا لەگەڵ بنیامین ناتانیاهو سەرۆكوەزیرانی ئیسڕائیل، وەك تیم كاریان كردووە و ڕایگەیاند: ئێران ناچارە ئاشتیی بكات، ئەگەر ئەمە نەكرێت، ئەوا هێرشەكانی دواتر زۆر قورستر دەبن.

تڕەمپ دەشڵێت: ئامانجمان لەنێوبردنی توانای ئێران بوو بۆ پیتاندنی یۆرانیۆم و ڕاگرتنی هەڕەشەی ئەتۆمی ئەو دەوڵەتە بوو كە پشتیوانی سەرەكی تیرۆرە لە جیهاندا". ترەمپ هێرشەكانیشی بە "سەركەوتنێكی ناوازە" لە قەڵەم دا.