عێراق: جموجوڵی نائاسایی نییە و هێز لەنێوان هەرێم و بەغداد جوڵەی پێ نەكراوە

پەیام 

شانەی ڕاگەیاندنی ئەمنیی عێراق جوڵاندنی هێز ڕەت دەكاتەوە و دەڵێت: هیچ جموجووڵێكی نائاسایی لە ناوچەكانی نێوان عێراق و هەرێم ڕووینەداوە.

دوای ئەوەی ئێوارەی دوێنێ هەواڵی جموجوڵی نائاسایی و جوڵاندنی هێز لە ناوچەكانی نێوان پێشمەرگە و سوپای عێراق بڵاو بووەوە، بەڵام لە شانەی ڕاگەیاندنی ئەمنیی عێراق لەڕاگەیاندراوێكدا ئاماژەی بەوەداوە لە میدیاكاندا، دەنگۆی ئەوە بڵاوكراوەتەوە كە گوایە هێزەكانی سوپای عێراق، دەستەی حەشدی شەعبی یان پێشمەرگە لە ناوچە سنوورییە هاوبەشەكانی نێوان ناوەند و هەرێم جووڵەیان پێكراوە، ڕایگەیاندووە: "ئێمە ئەو دەنگۆیانە ڕەتدەكەینەوە و دووپاتی دەكەینەوە ئەو ناوچانە بە هاوبەشی و بە هەمانگی لەنێوان ناوەند و هەرێم بەڕێوەدەبرێن".

ڕاشیگەیاندووە: "لەئێستادا، هیچ جموجووڵێكی سەربازیی لە ناوچە سنوورییە هاوبەشەكانی نێوان ناوەند و هەرێم، ڕووی نەداوە، هەروەها ئاڵنگارییە هەنووكەییەكان پێویستیان بە هەماهەنگی و هاریكاریی هاوبەشە و ئەگەر جموجووڵێك هەبووبێت، ئەوە بە هەماهەنگی بووە".

هەروەها دووپاتی كردووەتەوە ئۆپەراسیۆنە هاوبەشەكان و ئاڵوگۆڕی زانیارییە هەواڵگرییەكان لەنێوان هێزە ئەمنییەكانی عێراق و هێزەكانی پێشمەرگە لە ناوچە سنوورییە هاوبەشەكانی نێوان ناوەند و هەرێم دژبە تیرۆر بەردەوام بن.