05/07/2025
383 جار خوێنراوەتەوە
فەرماندەیی گشتیی هێزە چەكدارەكانی عێراق وەڵامی وەزارەتی ناوخۆی هەرێم دەداتەوە
پەیام
فەرماندەیی گشتیی هێزە چەكدارەكانی عێراق ڕاگەیەنراوێكی بڵاو كردەوە و تێیدا تۆمەتباركردنی گرووپێكی حەشدی شەعبی بە هێرشە درۆنییەكانی سەر هەرێمی كوردستان ڕەت دەكاتەوە.
لە ڕاگەیەنراوێكدا، سەباح نوعمان وتەبێژی فەرماندەیی گشتیی هێزە چەكدارەكانی عێراق ئاشكرای كرد: تۆمەتباركردنی دامەزراوەیەكی ئەمنیی فەڕمیی عێراق لەلایەن وەزارەتی ناوخۆی هەرێمەوە سەركۆنە و لەژێر هەر پاساوێكدا ڕەت دەكەینەوە.
پێشتر وەزارەتی ناوخۆی حكومەتی ماوەبەسەرچووی هەرێمی كوردستان لە ڕوونكردنەوەیەكیدا ڕایگەیاندبوو "هێرشە درۆنییەكان بۆ سەر هەرێمی كوردستان لەلایەن هەندێك گرووپی سەر بە حەشدی شەعبی بە مەبەستی ئاژاوەنانەوە ئەنجام دەدرێن".
لەوبارەشەوە سەباح نوعمان ڕایگەیاند: هیچ بەڵگەیەك بۆ ئەنجامدانی هێرشە درۆنییەكان لەلایەن حەشدی شەعبییەوە بەردەست نییە كە داوا دەكەین ئەگەر بەڵگە هەیە پێشكەشی لایەنە حكومییەكان بكرێت.
وتەبێژی فەرماندەیی گشتیی هێزە چەكدارەكانی عێراق ڕایشیدەگەیەنێت: ئاڵنگارییەكانی هەنووكە خوازیاری هاوكاری و هەماهەنگییە لە ڕێكەی كەناڵە فەڕمییەكانەوە لەبری ئەوەی پەنا بۆ كەناڵ و ڕاگەیاندنەكان ببرێت.
لە تۆڕە کۆمەڵایەتیەکان شەیری بکە