كار بۆ هەڵوەشاندنەوەی حەشدی شەعبی و تێكەڵكردنی بە سووپا و پۆلیس دەكرێت

پەیام 

سیاسییەكی عێراق گرفتی مووچەی حەشدی شەعبی بە ئاماژەی سەرەتای هەڵوەشاندنەوە و تێكەڵكردنی ئەو هێزانە بە دامەزراوە ئەمنییە فەڕمییەكان بەر لە ئەنجامدانی هەڵبژاردن دەزانێت.

لە پۆستێكیدا لە تۆڕی كۆمەڵایەتیی فەیسبووك، ئەسیل نوجەیفی كە سیاسییەكی دیاری عێراقە باسی لەوە كردووە "گرفتەكانی پەیوەست بە مووچەی هێزەكانی حەشدی شەعبی سەرەتای پرۆسەی هەڵوەشاندنەوەی ئەو گروپانە و تێكەڵكردنیانە بە هێزە چەكدارە فەڕمییەكان، ئەوەیش بەر لە ئەنجامدانی هەڵبژاردنی ئەنجوومەنی نوێنەرانی عێراق ئەنجام دەدرێت".
ئەسیل نوجێفی كە پارێزگاری پێشووتری نەینەوا و برای ئوسامە نوجێفی سەرۆكی پێشووتری ئەنجوومەنی نوێنەرانە، دەڵێت: پیشنیازگەلێك بۆ تێپەڕاندنی قەیرانەكە پێشكەش كراوە، وەك دامەزراندنی سەكۆی جێگرەوە، یان پەنابردن بۆ دابەشكردنی مووچە بە شێوەی كاش، بەڵام ئەم هەوڵانە نالۆژیكین، چونكە وەزارەتی دارایی و بانكی ناوەندی كە پارەكە دابین دەكەن هەڕەشەی سزاكانی ئەمریكایان لەسەر دروست دەبێت.

ئەو سیاسییە عێراقییە ڕایشیگەیاند: تاكە چارەسەر ئەوەیە ئەو گروپانە هەڵوەشێنرێنەوە و دوور بخرێنەوە لەو كەسانەی بەر سزاكان كەوتوون، پاشان ئەوەی لێیان دەمێنێتەوە، وەك تاك، لەگەڵ سوپا و پۆلیس تێكەڵ بكرێن.

ئەو وتیشی: حكومەتی عێراق بەباشی ئاگاداری ئەم سیناریۆیەیە، بەڵام تا ئەو كاتەی سەركردەی گروپەكان بڕوا پێ دەهێنێت كە ئەوە باشترین چارە، بێدەنگی هەڵدەبژێرێت.