وتەبێژی حكومەتی عێراق: چاكسازیی بە كۆنترۆڵكردنی چەك و بنەبڕكردنی گەندەڵی دێتە دی

پەیام

وتەبێژی حكومەتی عێراق ڕایدەگەیەنێت: چاكسازیی دامەزراوەیی بە كۆكردنەوەی چەك لە دەستی دەوڵەت و بەرەنگاربوونەوەی گەندەڵی دەست پێدەكات و بۆ ئەوەش سەرۆكوەزیران بە كۆدەنگی پشتگیریی كراوە. 

حەیدەر عەبوودی وتەبێژی حكومەتی عێراق جەختی كردەوە "سەرۆكوەزیران پاڵپشتییەكی گشتگیری سیاسی و نیشتمانی لەپشتە بۆ جێبەجێكردنی ئەم هەنگاوانە و وشككردنی سەرچاوەكانی گەندەڵی لە دامودەزگاكانی حكومەتدا". وتیشی: بۆ پاراستنی بەرژەوەندییە گشتییەكان لە چەندین دۆسیەی جیاوازدا ئەنجوومەنی نوێنەران دەسەڵاتی تەواوی بە حكومەت بەخشیوە.

عەبوودی ئاماژەی بەوەش دا كە دیدگای حكومەت بۆ چاكسازیی گشتگیر لەسەر دوو بنەمای سەرەكی وەستاوە، ئەوانیش: كۆنترۆڵكردنی چەك و بنبڕكردنی گەندەڵی دارایی و كارگێڕین"، هەروەها وتی: عێراق لە ئێستادا پێویستییەكی زۆری بە ژینگەیەكی نێوخۆیی سەقامگیر و ئارام هەیە تا بتوانێت وەبەرهێنانی بیانی ڕابكێشێت، ئەوەش تەنیا لە ڕێگەی سەپاندنی دەسەڵاتی یاسا و چەسپاندنی شكۆی دەوڵەتەوە دێتە دی.

سەبارەت بە پەیوەندییە نێودەوڵەتییەكان، وتەبێژی حكومەتی عێراق ڕایگەیاند: میكانیزمی هەماهەنگی لەگەڵ واشنتۆن لەسەر بنەمایەكی ڕوون و جێگیر دانراوە و پەیوەندییەكان زیاتر سەرنج دەخەنە سەر بەرژەوەندییە هاوبەشەكان لە كەرتەكانی ئابووری و ئەمنییدا.