داخستنی گەرووی هورمز نزیكەی 38 ملیار دۆلار زیانی بە عێراق گەیاندووە

پەیام

قەبارەی ئەو زیانە ماددییانە ئاشكرا دەكرێت كە عێراق بەهۆی داخستنی گەرووی هورمزەوە بەری كەوتووە.

ڕوانگەی ئیكۆی عێراقی تایبەت بە پرسی ئابووری بڵاوی كردەوە: عێراق بەهۆی داخستنی گەرووی هورمز و وەستانی هەناردەی نەوتەوە تا ئێستا نزیكەی 350 ملیۆن بەرمیل نەوت كەمی كردووە و بەو هۆیەشەوە 37 ملیار و 700 ملیۆن دۆلار زیانی بەر كەوتووە.

لە بەشێكی دیكەی ڕاپۆرتەكەی ئیكۆدا هاتووە "عێراق پێش داخستنی گەرووی هورمز مانگانە لە نێوان 103 بۆ 107 ملیۆن بەرمیل نەوتی هەناردە كردووە، داخستنی گەرووەكە لە 28ی شوبات، مانگی دووی ئەمساڵەوە بووە هۆی كەمبوونەوەی هەناردەی نەوت و ئەم مانگەش 79 ملیۆن و 600 هەزار بەرمیل نەوت لە هەناردەكردن كەمی كردووە".
بەپێی ڕاپۆرتەكە مانگی چواریش بەرزترین ئاستی لە كەمكردنی هەناردەی نەوتی عێراقی تێدا تۆمار كراوە كە 93 ملیۆن و 115 هەزار و 870 بەرمیل بووە.  

ڕوانگەی ئیكۆ داوای پەلەكردن لە جێبەجێكردنی پڕۆژەی "شامی نوێ" وەك جێگرەوە بۆ گرەنتییكردنی هەناردەی نەوت دەكات و باسی لەوەش دەكات كە ئەو پڕۆژەیە پێویستییەكی ستراتیژییە بۆ گرەنتییكردنی سەقامگیری هەناردەی نەوتی عێراق و دابینكردنی جێگرەوەیەك دوور لە مەترسیە جیۆسیاسییەكان كە هەڕەشە لە ڕێڕەوە ئاوییەكان دەكات.