سەرۆكۆمار و سەرۆكوەزیران تاوتوێى هەڵبژاردن مووچەی هەرێمیان کرد

پەیام 

ئەمڕۆ سەرۆكوەزیران و سەرۆكۆماری عێراق كۆبوونەوە و تاوتوێى هەڵبژاردنى پەرلەمان و چارەسەری گرفتی مووچەی فەرمانبەرانی هەرێم كرد.

بە پێی ڕاگەیەندراوی سەرۆكایەتی ئەنجومەنی وەزیرانی عێراق، محەمەد شیاع سودانی سەرۆكوەزیرانی عێراق پێشوازی لە عەبدولەتیف ڕەشید سەرۆكۆماری عێراق كرد و لە كۆبوونەوەكەدا گفتوگۆیان لە بارەی باردۆخی گشتی و پێشهاتەكانی ناوچەكە و ئاستەنگەكان كردووە.

لە ڕاگەیەندراوەكەدا ئەوەش ئاشكرا كراوە لە بەشێكی دیدارەكەدا تاوتوێی دۆسیەی دابینكردنی مووچەی فەرمانبەرانی هەرێمی كوردستان و كاركردن لەسەر چارەسەركردنی دۆسیە هاوبەشەكان كراوە، لە چوارچێوە دەستووری و یاساییە كارپێكراوەكاندا. ئەوە لە كاتێكدایە كە ماوەی زیاتر لە دوو مانگە فەرمانبەرانی هەرێم لە مووچە بێبەش كراون.

هەروەها باسیان لە ئامادەكارییە بەردەوامەكان كرد بۆ ئەنجامدانی هەڵبژاردنی ئەنجومەنی نوێنەران لە وادەی دیاریكراوی خۆییدا، بۆ ئەوەی ئەنجامەكانی ڕەنگدانەوەی ڕاستەقینەی خواستەكانی گەلی عێراق بێت.