سووریا.. شەڕ لەنێوان درووزییەكان و هێزە ئەمنییەكان دروستبوویەوەو دەیان کەس کوژران

پەیام 

جارێكی دیكە پێكدادانی سەربازی لەنێوان گرووپە چەكدارە درووزییەكان و هێزە ئەمنییەكانی سوریادا درووست بوویەوە و لانیكەم 37 كەس كوژراون و نزیكەی 100 كەسی دیكەش بریندار بوون.

بەپێی ڕاگەیەنراوی ڕوانگەی سووری بۆ مافەكانی مرۆڤ، لە ئەنجامی شەڕ و پێكدادان لە نێوان گرووپە چەكدارەكان لە سوەیدا لە باشووری سووریا، 37 كەس كوژراون و نزیکەى 100 كەسی دیكەش بریندار بوون.

بەپێی ڕاگەیەنراوی ڕوانگەی سووری بۆ مافەكانی مرۆڤ، پێكدادانە سەربازییەكە كاتێك سەری هەڵداوە كە گەنجێكی درووزی لەلایەن هێزە ئەمنییەكانی سوریاوە ڕفێندراوە و دواتر شەڕ و پێكدادانی سەربازی درووست بووە و هێشتا بەردەوامە.

لەسەر پێكدادانەكە وەزارەتی بەرگریی سووریا بەیاننامەیەكی بڵاو كردەوە و رایگەیاند، "بە خەم و نیگەرانییەكی قووڵەوە چاودێریی ئەو پێشهاتە خوێناوییانە دەكەین كە لە دوو رۆژی رابردوودا پارێزگای سوەیدایان گرتووەتەوە، كە بوونەتە هۆی گیانلەدەستدانی زیاتر لە 30 كەس و برینداربوونی نزیكەی 100 كەسی دیكە ."