مەسرور بارزانى و ستیڤن ڤەیگن: پێویستە حكومەتی نوێی هەرێم پێش هەڵبژاردنی پەرلەمانی عێراق پێكبهێرێت

پەیام

مەسرور بارزانی، سەرۆكی حكومەتی ماوەبەسەرچووى هەرێم و ستیڤن ڤەیگن هەڵسوڕێنەری باڵیۆزخانەی ئەمریکا لە عێراق كۆبوونەوە و هەردولا هاوڕابوون لەسەر ئەوەی پێویستە کابینەی نوێی حکومەتی هەرێم پێش هەڵبژاردنی پەرلەمانی عێراق پێکبهێنرێت.

بەپێی راگەیەندراوێكی حكومەتی ماوەبەسەرچووى هەرێم، ئەمڕۆ ١٩ى ٧ى ٢٠٢٥ مەسرور بارزانی پیشوازیی لە ستیڤن ڤەیگن کرد و لە كۆبونەوەی نێوانیاندا دۆخی گشتیی عێراق و ناوچەکە و پتەوکردنی زیاتری پەیوەندیی دولایەنە تاوتوێ کران.

لە راگەیەندراوەكەدا هاتووە: باڵیۆز ڤەیگن، پشتیوانیی وڵاتەکەی بۆ قەوارەی فیدراڵی و هەرێمی کوردستانێکی بە هێز دووپات کردەوە و مەسرور بارزانیش سوپاسی پشتگیریی بەردەوامیی ئەمریکای لە هەرێمی کوردستان کرد.

بەپێی راگەیەندراوەكە "هەردولا هاوڕابوون لەسەر ئەوەی پێویستە حکومەتی فیدراڵ لەزوترین کاتدا، موچە و شایستە داراییەکانی هەرێمی کوردستان بنێرێت و لە نزیکترین کاتیشدا، هەناردەکردنی نەوتی هەرێم لە ڕێگەی بەندەری جەیهانی تورکیا دەستپێبکاتەوە. هەروەها دەبێت هێرشی تیرۆریستی و تێکدەرانەی درۆنەکان بۆ کێڵگە نەوتییەکان و ژێرخانی وزەی هەرێم بوەستێت".

لە بەشێکی دیکەی کۆبونەوەدا، بەگوێرەی راگەیەندراوەكە، هەردولا هاوڕابوون لەسەر ئەوەی پێویستە کابینەی نوێی حکومەتی هەرێمی کوردستان پێش هەڵبژاردنی پەرلەمانی عێراق کە بڕیارە مانگى ١١ى ئەمساڵ بەڕێوەبچێت، پێکبهێنرێت.