ئاگربەست لە پارێزگای سوەیدای سووریا چووە بواری جێبەجێكردنەوە

پەیام 

ئاگربەستی نێوان گرووپە میلیشیاكانی هێزە عەرەبەكان و درووزییەكان چووە بواری جێبەجێكردنەوە و نوێنەری ئەمریكاش لەو وڵاتە رایگەیاند دەبێت چەك تەنها لە دەستی دەوڵەتدا بێت.

وتەبێژی وەزارەتی ناوخۆی سووریا نورەددین ئەلبابا ڕایگەیاند، وەزارەتی ناوخۆ بە مەبەستی جێبەجێكردنی ئاگربەست لە سوەیدا هەوڵێكی زۆر چری داوە و هێزە ئەمنییەكان لە باكوور و ڕۆژئاوای شارەكە جێگر كراون، لەگەڵ ئەوەشدا پێكدادانە سەربازییەكان ڕادەگیردرێن.

نورەددین ئەلبابا ڕایگەیاند، شارەكە لە چەكدارانی هۆزەكان پاككرایەوە و ڕاشیگەیاند، چەكداری هۆزەكان بە مەبەستی جێبەجێكردنی ئاگربەستەكە لە شارەكە كشاونەتەوە.

لە ڕاگەیاندراوێكیشدا هۆزەكان بڵاویان كردەوە بە مەبەستی پابەندبوونیان بە بڕیاری ئاگربەست چەكدارەكانیان لە سوەیدا كشاندووەتەوە.

لەسەر پێكدادانەكان نوێنەری ئەمریكا لەو وڵاتە رایگەیاند، دەبێت پێكدادانە سەربازییەكان لە سوەیدا ڕابگیردرێن و چەكەكەكان بێدەنگ بكرێن، لەگەڵ ئەوەشدا دەبێت چەك تەنها لەدەستی سوپای فەرمی سووریادا بێت.