19/07/2025
381 جار خوێنراوەتەوە
سووریا.. سەرەڕای ڕاگەیاندنی ئاگربەست، ڕووبەڕووبووەنەوەكان لە سووەیدا بەردەوامە
پەیام
سەرباری ڕاگەیاندنی ئاگربەست لەلایەن سەرۆكایەتی سووریاوە، شەڕو پێكدادانی توند لەنێوان هێزە كۆچەرییە عەرەبەكان و میلیشیا دورزییەكانی هیجریدا بەردەوامە.
ئاژانسی هەواڵی سووری (سانا) ڕایگەیاند: لەگەڵ ڕاگەیاندنی ئاگربەستی سەرتاسەریدا، تاوەكو ئێستا شەڕ و ڕووبەڕووبوونەوەكان لەنێوان هۆزەكان و میلیشیا هیجرییەكاندا لە سووەیدا بەردەوامە.
ڕوانگەی سووری بۆ مافەكانی مرۆڤیش ڕایگەیاند: لە ژمارەیەك گەڕەكی شاری سووەیدا جارێكی دیكە ڕووبەڕووبوونەوەكان لەنێوان چەكدارانی هۆزەكان لەلایەك و چەكدارانی دورزی لەلایەكی دیكەوە سەریهەڵداوەتەوە، كە ئەوەش پێشێلكاری ئەو ئاگربەستەیە كە بە چاودێری نێوەدەوڵەتی پێی گەیشتوون.
ڕوانگەكە ڕایشیگەیاند: ئەم پەرەسەندنە نوێیە لەكاتێكدایە، كە هێزەكانی سەربە ئاسایشی گشتیی گەیشتوونەتە دەوروبەری شاری سووەیدا، لەچوارچێوەی چێبەجێكردنی بەندەكانی ئەو ڕێككەوتنەی لەلایەن وڵاتانەوە دانراوە، ئامانج لێی كەمكردنەوەی گرژییەكان و ڕێكخستنی هێڵەكانی بەریەك كەوتنە.
سەرچاوەكانی ڕوانگەكەش دەڵێن: لەسەرەتای سەرهەڵدانی گرژییەكانەوە لە حەوت ڕۆژ لەمەوبەرەوە تاوەكو ئێستا، ئاماری قوربانیان بۆ 940 كوژراو بەرزبووەتەوە، كە زۆربەیان هاووڵاتی مەدەنین.
جێی ئاماژەیە بەیانی ئەمڕۆ سەرۆكایەتی سووریا ئاگربەستی سەرتاسەری و ڕاگرتنی دەستبەجێی جەنگی ڕاگەیاند و داوای لە سەرجەم لایەنەكان لەسووریا كرد پابەند بن پێیەوە.
لە تۆڕە کۆمەڵایەتیەکان شەیری بکە