دواجار شتیگن تەسلیم بوو

پەیام سپۆڕت - مەڕوان تاڵیب

مارک ئاندریا تێر شتیگنی گۆڵپارێزی یانەی بەرشەلۆنە ئامادەیی نیشاندا هاوکاری تیپەکەی بکات و کۆتایی بە کێشەکانیان بهێنێت.

 لە چەند ڕۆژی ڕابردوو گۆڵچییە ئەڵمانییەکە ڕەتی کردەوە واژووی بەڵگەنامەی بەرشەلۆنە بکات تاکو ماوەی دوورکەوتنەوەی زیاتر لە چوار مانگ بێت و لەو ڕێگەیەوە بتوانێت ناوەکەی لە لیستی یاریزانانی لالیگا دەربهێنێت و یاریزانە نوێیەکان تۆمار بکات، دواتریش بەرشەلۆنە بڕیاریدا شارەی کاپتنی لێوەربگرێتەوە.

شتیگن بەیاننامەیەکی فەڕمی لەسەر ئەو کێشانە بڵاو کردەوە و ڕایگەیاند، بڕیاری نەشتەرگەرییەکەی بە ڕاوێژ لەگەڵ پزیشکی پسپۆڕ و ڕەزامەندی بەرشەلۆنە دراوە و لە ڕابردووش ماوەی دوورکەوتنەوەی بە سێ مانگ دیاری کردووە بە پشت بەستن بە زانیاری پزیشکەکان.

شتیگن دەشڵێت: نەشتەرگەرییەکەی هیچ پەیوەندییەکی بە تۆمارکردنی ناوی یاریزانە نوێیەکانەوە نییە، بەڵام دەتوانین لە ڕێگەی گفتوگۆوە چارەسەری کێشەکان بکەین و ئامادەم بۆ هاوکاریکردنی یانەی بەرشەلۆنە و ئاسانکاری بۆ پێدانی مۆڵەتی پێویست تاکو ماوەی دوورکەوتنەوەکەم ڕابگەیەنرێت.