پێش 4 هەفتە
190 جار خوێنراوەتەوە
ئاگر لە مزگەوتی مێژوویی قورتوبە لە ئیسپانیا كەوتەوە و بەشێكی سووتا
پەیام
ئاگرێكی گەورە لە مزگەوتی مێژوویی قورتوبە لە ئیسپانیا كەوتەوە و بەشێكی مزگەوتەكە سووتا.
ئاژانسی هەواڵی ئیسپانیا بڵاویكردەوە: دوێنێ هەینی ئاگر لە یەكێك لە هۆڵەكانی مزگەوتی قورتوبە كەوتەوە كە وەك كۆگای ئامێرەكان بەكار دەهێنرا، دواتریش ئاگرەكە بۆ هۆڵەكانی دیكەی مزگەوتەكە تەشەنەی كردووە و زیان بەر چەند شوێنێكی مزگەوتەكە كەوتووە.
بەپێی میدیا ناوخۆییەكان، هۆكاری كەوتنەوەی ئاگرەكە بەهۆی گڕگرتنی گسكێكی كارەباییەوە بووە و دواتر تەشەنەی سەندووە.
پارێزگاری قورتوبە ڕایگەیاند، ئاگرەكە زوو كۆنترۆڵ كراوە و ڕێگە نەدراوە كارەسات دروست ببێت.
مزگەوتی قورتوبە یەكێكە لە گەورەترین و دیارترین شوێنەوارە ئیسلامییەكان لە ئیسپانیا و ئەورووپا، دەگەڕێتەوە بۆ سەردەمی ئەندەلوس، لە ساڵی 138 ی كۆچیی لەلایەن دەسەڵاتدارانی خەلافەتی ئومەوییەوە لە ئەندەلووس دەست بە دروستكردنی مزگەوتە كراوە و خوێندكارانی زانستە جیاوازەكان لە تەواوی ئەورووپاوە ڕوویان تێ كردووە و لەوێ خوێندوویانە. دوای ڕووخاندنی دەسەڵاتی مسوڵمانان لە ئەندەلوس، مزگەوتە كراوەتە كەنیسە. ئێستاش یەكێكە لە شوێنەوارە ئاینییەكان و لەلایەن یونیسكۆوە تۆمار كراوە و ساڵانە نزیكەی دوو ملیۆن و نیو گەشتیار سەردانی دەكەن.
ئەندەلوس پێگەی دەسەڵاتدارێتیی مسوڵمانان بووە و بۆ ماوەی نزیكەی 800 ساڵ لە ئیسپانیا و پورتوگال حوكمی كردووە و ڕۆڵی كارایان لە گەیاندنی شارستانییەت و زانست و زانیاری بە وڵاتانی ئەورووپا هەبووە.
لە تۆڕە کۆمەڵایەتیەکان شەیری بکە