08/12/2025
208 جار خوێنراوەتەوە
پێكدادانە سەربازییەكانی نێوان تایلەند و كەمبۆدیا دەستیپێكردەوە
پەیام
دوای ئاگربەست و ڕێكەوتن، جارێكی دیکە پێكدادانی سەربازی لە نێوان تایلەند و كەمبۆدیا دەستی پێ كردەوە و سوپای تایلەند رایگەیاند، هێرشی ئاسمانییان كردوەتە سەر چەند پێگەیەك لە كەمبۆدیا.
وتەبێژی سوپای تایلەند لە ڕاگەیەنراوێكدا ئەوەی بڵاو كردەوە، كە هێرشی ئاسمانییان كردووەتە سەر چەند پێگەیەك لە كەمبۆدیا، دوای ئەوەی پێكدادانێكی سەربازی لەسەر سنوور روویداوە و سەربازێكی تایلەندی كوژراوە.
سوپای تایلەند راشیگەیاندووە، لەگەڵ ئەوەی بە فڕۆكەی جەنگی بۆردومانی كەمبۆدیایان كردووە، بە تانك و تۆپیش چەند پێگەیەكی سەربازییان بۆردومان كردووە.
بەپێی راگەیەنراوی سوپای تایلەند، بەهۆی پێكدادانەكانی ئەم بەیانییەوە، نزیكەی 35 هەزار كەس لە ناوچە سنورییەكان لەگەڵ كەمبۆدیا بۆ ناوچەی ئارام گوازراونەتەوە.
هاوینی ئەمساڵ جەنگی نێوان تایلەند و كەمبۆدیا هەڵگیرسا و پێنج رۆژ بەردەوام بوو، لەو جەنگەدا 43 كەس كوژران و نزیكەی 300 هەزار كەسیش ئاوارەبوون.
بەڵام مانگی دەی ئەمســاڵ بە نێوەندگیری دوناڵد تڕەمپ سەرۆكی ئەمریكا، ئاگربەست لە نێوان هەردوو وڵاتی تایلەند و كەمبۆدیا واژوو كرا و بە فەرمی كۆتایی بە جەنگ و پێكدادانە سەربازییەكان هێنرا.
لە تۆڕە کۆمەڵایەتیەکان شەیری بکە