09/08/2025
330 جار خوێنراوەتەوە
سەرۆكی ئۆكرانیا ڕەتی دەكاتەوە لە بەرانبەر ئاشتی خاكەكەی بە ڕووسیا بدات
پەیام
سەرۆكی ئۆكرانیا ئەنجامدانی دانوستان لەگەڵ ڕووسیا بەبێ بەشداری وڵاتەكەی دژ بە ئاشتی ناو دەبات و ڕەتیشی دەكاتەوە سازش لەسەر خاكەكەی بكات.
ڤلۆدیمێر زیلینیسكی سەرۆكی ئۆكرانیا ڕایگەیاند: هەر چارەسەرێك بۆ جەنگی ئۆكرانیا لەگەڵ ڕووسیا بەبێ بەشداریی كیێڤ هەنگاوێكە دژ بە ئاشتی و چارەسەرێكی مردووی لێ دەكەوێتەوە و هەرگیز سەركەوتوو نابێت.
لە میانی لێدوانێكی لەبارەی ڕاگەیاندنی كات و شوێن و بەرنامەی كاری كۆبوونەوەی لوتكەی نێوان سەرۆكی ئەمریكا و ڕووسیا، سەرۆكی ئۆكرانیا وتیشی: ئۆكرانیا سەبارەت بە خاكەكەی ناتوانێت دەستوور پێشێل بكات و ڕادەستی داگیركەرانی ناكات.
قسەكانی سەرۆكی ئۆكرانیا دوای ئەوە هات كە پێشتر سەرۆكی ئەمریكا ئاماژەی بەوە كردبوو بۆ گەیشتن بە ڕێككەوتنی ئاشتی نێوان مۆسكۆ و كیێڤ تاوتوێی ئاڵوگۆڕی خاكیش لەنێوان هەر دوو وڵاتدا دەكرێت.
لەوبارەوە زیلینیسكی وتی: هیچ خەڵاتێك بە ڕووسیا نادەین لە بەرانبەر ئەوەی دەیكات، ئۆكرانییەكان خاكەكەیان بە داگیركەر نادەن.
لە تۆڕە کۆمەڵایەتیەکان شەیری بکە