توركیا بەڵێنی بەردانەوەی بڕێكی زیاتری ئاو بە عێراق دەدات

پەیام 

توركیا بەڵێنی بەردانەوەی بڕێكی زیاتری ئاو بە عێراق دەدات و موقتەدا سەدریش هۆشداری لە پیسبوونی ئاو دەدات.

لە ڕاگەیەنراوێكیدا، عەون زیاب عەبدوڵڵا، وەزیری سەرچاوەكانی ئاوی عێراق، بڵاوی كردووەتەوە، پەیوەندیی لەگەڵ لایەنی توركی ئەنجام داوە و لەگەڵیان باسی لەبەردانەوەی ئاوی ڕووبارەكانی دیجلە و فوڕات كردووە بە مەبەستی تێپەڕاندنی قەیرانی كەمیی ئاو و پاراستنی ڕەوتی ئاسایی دوو ڕووبارەكە.

بەپێی ڕاگەیەنراوەكە "لایەنی توركی تێگەیشتنی تەواوەتیی لە گرفتەكە ڕاگەیاندووە و بەڵێنی بە لایەنی عێراقی داوە بڕی بەردانەوەی ئاوی بەنداوەكانی وڵاتەكەی لەسەر ڕووبارەكانی دیجلە و فورات بۆ عێراق زیاتر بكات".

وەزیری سەرچاوەكانی ئاوی عێراق ڕایشیگەیاند: پەیوەندییەكەی لەگەڵ بەرپرسانی توركیا لە چوارچێوەی هەوڵە بەردەوامەكاندا دێت بۆ كەمكردنەوەی ئەو كورتهێنانەی عێراق لە ئاودا پێوەی گیرۆدە بووە، بەهۆی ئەو وشكەساڵییەی ناوچەكە بەگشتی و عێراق بەتایبەت بەدەستییەوە دەناڵێنێت.

لای خۆیشیەوە دوێنێ‌، هەینی موقتەدا سەدر ڕێبەری ڕەوتی سەدر لە تۆڕی ئێكس هۆشداری لەبارەی پیسبوونی ئاوی وڵاتەوە دا و ئاماژەی بەوە كرد "ناكرێت لە بابەتی مرۆیی بێدەنگ بین".

سەدر هاشتگێكی بە ناوی "ئاوی عێراق لە پیسبوون ڕزگار بكەن" ڕاگەیاندووە.