3 کاتژمێر پێش ئێستا
103 جار خوێنراوەتەوە
یەكێتیی مامۆستایان: پڕۆسەی خوێندن بەرگەی زیاتر لەوە ناگرێت بە كەموكوڕییەوە بەڕێوەبچێت
پەیام
یەكێتیی مامۆستایانی كوردستان ڕایدەگەیەنێت: پڕۆسەی خوێندن بەرگەی زیاتر لەوە ناگرێت بە كەموكوڕییەوە بەڕێوەبچێت.
لە ڕاگەیەنراوێكدا بەبۆنەی نزیكبوونەوەی ساڵی نوێی خوێندن، مەكتەبی سكرتارییەتی یەكێتیی مامۆستایانی كوردستان ژمارەیەك داواكاریی ئاشكرا دەكات و دەڵێت: ئەم داواكارییانە دەبێت كاری جددی لەسەر بكرێت تاكو پڕۆسەی پەروەردە و خوێندنی باڵا بە باشیی بەڕێوەبچێت.
یەكێتیی مامۆستایانی كوردستان داوا دەكات كێشەی مووچە چارەسەر بكرێت و مانگانە بدرێت و چیدی ئەو باتە تێكەڵی ئەجێندای جۆراوجۆر نەكرێت. داواش دەكات بەرزكردنەوەی مووچە دەستپێبكاتەوە كە لە ساڵی 2016ـەوە ڕاگیراوە.
یەكێتیی مامۆستایان ڕایشیدەگەیەنێت: مامۆستایانی گرێبەست بكرێنە هەمیشەیی، سوود لە مامۆستایانی وانەبێژیش ببینرێت، ئەوانەی لادراون، یان گرێبەستیان لەگەڵ نەكراوە.
سەبارەت بە مامۆستایانی خانەنشینكراو، ڕاگەیەنراوەكەی یەكێتیی مامۆستایان داوا دەكات تەواوی مووچەكانیان و ئەو پاداشتانەی بۆیان دیاریی كراوە پێ بدرێت.
لە كۆتاییشدا یەكێتیی مامۆستایانی كوردستان جەخت لەسەر داواكارییەكانی ڕاگەیەنراوەكەی دەكاتەوە و ڕایدەگەیەنێت: پڕۆسەی پەروەردە و فێركردن بەرگەی زیاتر لەوە ناگرێت كە بە كەموكوڕییەوە بەڕێوە بچێت، ئێمەش خەباتی مەدەنی بە هەموو جۆرەكانیەوە بۆ هێنانەدی ئامانجەكان بە ڕەوا دەزانین.
لە تۆڕە کۆمەڵایەتیەکان شەیری بکە