تائێستا 18 هەزار و 830 كەس لە كەمپەكانی هۆل و ڕۆژ گەڕاوەنەتەوە عێراق

پەیام 

وەزیری دەرەوەی عێراق ڕایگەیاند: 18 هەزار و 830 كەس لە كەمپەكانی هۆل و ڕۆژ گەڕاونەتەوە.

لە میانی بەشداری لە كۆنفڕانسی نێودەوڵەتی گەڕاندەوەی خێزانەكانی داعش لە كەمپەكانی هۆل و ڕۆژ، لە نیویۆرك، فواد حسێن وەزیری دەرەوە و جێگری سەرۆكوەزیرانی عێراق ڕایگەیاند، عێراق توانیویەتی تاكو ئێستا 18 هەزار و 830 كەس لە هەردوو كەمپەكە بۆ وڵاتەكەی بگەڕێنێتەوە و، ڕەوانەی ناوەندەكانی شیاندنەوەیان بكات وەك كەمپی ئەمەل.

وتیشی، عێراق پابەندە بە هەماهەنگییەكانی لەگەڵ كۆمەڵگەی نێودەوڵەتی بۆ ڕووبەڕووبوونەوەی تیرۆر و لە نێوبردونی داعش، ڕوونیشیكردەوە، لەو باوەڕەدایە كە كەمپی هۆل لە باكووری خۆرهەڵاتی سووریا مەترسیی ئەمنی و كۆمەڵایەتی لێدەكێتەوە و، پێویستە چارەسەر بكرێت.

كەمپی هۆل دەكەوێـتە باشووری شارۆچكەی هۆل لە پارێزگای حەسەكەی ڕۆژاوای كوردستان و، لەژێر كۆنترۆڵی ئیدارەی خۆسەر دایە، زیاتر لە 70  هەزار كەسی تێدا دەستبەسەر كراوە كە زۆرینەی خەڵكی عێراق و سووریان.