كەشتیگەلی خۆڕاگڕی 852 كیلۆمەتریان ماوە بگەن بە كەرتی غەززە

پەیام

كەشتیگەلی خۆڕاگری بۆ شكاندنی گەمارۆی سەر كەرتی غەززە زیاتر لە سنوورە ئاوییەكانی كەرتەكە نزیك دەبێتەوە و ڕایانگەیاند: 852 كیلۆمەتریان ماوە بۆ گەیشتن بە كەناراوەكانی كەرتەكە.

سەرەڕای فشاری هەندێك لە وڵاتانی ئەورووپی، كەشتیگەلی خۆڕاگری كە ئامانجی شكاندنی گەمارۆی سەر غەزززە لە كاتژمێرەكانی ڕابردوودا دوورگەی كریی یۆنانیان بەجێهێشت و بەرەو كەرتەكە بەڕێكەوتن، لە نوێترین زانیارییشدا ڕایانگەیاند: ئێستا 825 كیلۆمەتر لە غەززەوە دوورن.

ئەم كەشتیگەلە لە زیاتر لە 50 بەلەم و سەدان چالاكوان لە نزیكەی 45 وڵاتی جیاوازەوە، لەنێویاندا 54 فەڕەنسی و 15 بەلجیكی، جگە لە پزیشك و كەسایەتی دیار، پێكهاتووە.

كەشتییەكان لە كۆتایی مانگی ڕابردووەوە لە بەندەرەكانی بەرشەلۆنەی ئیسپانی و جەنەوای ئیتاڵی بە قۆناغ دەستیان بە گەشت كرد و ژمارەیەكیش لە وڵاتانی دیكەوە پەیوەندییان پێوە كردن، دوای ئەوەی لە ماوەی ڕابردوودا چەند جارێك لەلایەن قەوارەی زایۆنییەوە بە درۆن هێرش كرایە سەریان، ئیتاڵیا و ئیسپانیا كەشتیی سەربازییان بۆ یاوەریكردنیان و پاراستنی هاووڵاتییە سەرنشینەكانیان،  ناردووە.

لای خۆیشیانەوە زیاتر لە 140 هونەرمەند و نووسەر و ڕۆژنامەنووس لە فەڕەنسا و بەلجیكا داوایان لە حكومەتەكانیان كردووە پاراستنی دیپلۆماسی بۆ بەشداربووان دابین بكەن.