وەزارەتی نەوت گرێبەستێكی بۆ پەرەپێدانی چوار كێڵگەی نەوتی كەركووك واژوو كرد

پەیام

وەزارەتی نەوت واژۆكردنی گرێبەستی كاراكردنی پەرەپێدانی چوار كێڵگەی كەركووك و نۆژەنكردنەوەی دامەزراوەكانی غازی لەگەڵ كۆمپانیایەكی بەریتانی ڕاگەیاند.

حەیان عەبدولغەنیجێگری سەرۆكی ئەنجومەنی وەزیران بۆ كاروباری وزە و وەزیری نەوت،  سەرپەرشتی واژۆكردنی گرێبەستی كاراكردنی پەرەپێدانی چوار كێڵگەی كەركووك و نۆژەنكردنەوەی دامەزراوەكانی غازی كرد لەنێوان كۆمپانیای نەوتی باكوور و كۆمپانیای غازی باكوور و كۆمپانیای "بی پی" ی بەریتانی.

عەبدولغەنی جەختی لەسەر هەوڵی وەزارەت كردەوە بۆ زیادكردنی ڕێژەی بەرهەمهێنانی نەوتی خاو و غاز لە كەركووك بۆ پشتگیریكردنی ئابووری نیشتمانی و دابینكردنی پێداویستییەكانی سووتەمەنی.

هەروەها ئاماژەی بەوەدا كە ئەم گرێبەستە یەكێكە لە گرێبەستە بەڵێندەرەكان كە ئامانجی پەرەپێدانی كێڵگەكانی (كەركووك بە هەردوو "بابا و ئاڤانا"، جەمبور، بای حەسەن و خەباز) جگە لە نۆژەنكردنەوەی دامەزراوەكانی كۆمپانیای غازی باكوور، بۆ زیادكردنی بەرهەمهێنانی غاز بۆ دابینكردنی پێداویستییەكانی وێستگەكانی بەرهەمهێنانی كارەبا.