كۆمسیۆن: ڕێكاری یاسایی دژی سەرپێچیەكانی ماوەی بێدەنگی دەگیرێتە بەر

پەیام 

كۆمسیۆن جەخت لە گرتنەبەری ڕێكاری یاسایی دژی هەر سەرپێچیكارێكی ماوەی بێدەنگی پێش هەڵبژاردن، دەكاتەوە.

لە لێدوانێكیدا بۆ ئاژانسی هەواڵی عێراقی، جومانە غەلای وتەبێژی كۆمسیۆنی باڵای سەربەخۆی هەڵبژاردنەكان ڕایگەیاند: كۆمسیۆن ڕێكاری یاسایی دژی ئەو كاندیدانە دەگرێتە بەر، كە بە شكاندنی ماوەی بێدەنگی پێش هەڵبژاردن سەرپێچی تۆمار دەكەن و سزای داراییان بۆ دەنووسرێت.

جومانە غەلای ڕوونیشی كردەوە: بێدەنگیی هەڵبژاردن خۆی دەبینێتەوە لە بڵاونەكردنەوەی بانگەشە لە میدیا و تۆڕی كۆمەڵایەتی و نەبەستنی كۆڕ و كۆنگرە و نەناردنی نامەی نووسراو بۆ كۆكردنەوەی دەنگ و هەر شتێكیش لەو بارەیەوە بێت.

وتەبێژەكەی كۆمسیۆن وتیشی: تیمی چاودێری نووسینگەی نیشتمانی و نووسینگەی پارێزگاكان بە هەماهەنگی لەگەڵ دەستەی میدیا و پەیوەندییەكان و لایەنە پەیوەنددارەكان لە كارەكانیان بۆ چاودێری بانگەشەكان و ماوەی بێدەنگی بەردەوامن.

سبەی نۆی مانگی 11 كاتژمێر حەوتی بەیانی پرۆسەی دەنگدانی تایبەت لە عێراق بەڕێوەدەچێت و تا كاتژمێر شەشی ئێوارە دەخایەنێت، تێیدا ملیۆنێك و 313 هەزار و 890 كەسی سەربازی و ئەمنی مافی دەنگدانیان هەیە و 809 بنكەی دەنگدان ‌و چوار هەزار و 501 وێستگە بۆ ئەو مەبەستە تەرخان كراون.
هەر سبەی بۆ دەنگدانی تایبەتی 26 هەزار و 538 ئاوارەیش 17 بنكەی دەنگدان و 97 ویستگە تەرخان كراون.