سودانی بۆ هاووڵاتیان: هەڵبژاردن موڵكی ئێوەیە و دەنگەكانتان بناغەی پڕۆسەی دیموكراسییە

پەیام 

لە كۆتا ڕۆژی بانگەشەی هەڵبژاردندا، محەمەد شیاع سودانی سەرۆكوەزیرانی عێراق پەیامێك دەربارەی پڕۆسەكە بڵاو دەكاتەوە. 

سەرۆكوەزیرانی عێراق ئەمڕۆ هەیینی داوای لە هاووڵاتیانی عێراقی كرد بەشداری لە هەڵبژاردنی ئەنجومەنی نوێنەراندا بكەن، كە بڕیار وایە لە ناوەڕاستی ئەم هەفتەیە ئەنجام بدرێت.

سودانی لە لێدوانێكی تەلەفزیۆنیدا بە هاووڵاتیانی عێراقی وت: هەڵبژاردن موڵكی ئێوەیە و دەنگەكانتان بناغەی پڕۆسەی دیموكراسییە و خۆتان خاوەنی بڕیارن. 

سودانی ڕایشیگەیاند: بەشداریكردنتان لە هەڵبژاردن دەبێتە پەیامێكی ڕوون بۆ عێراقێكی نوێ‌، كە ڕۆڵەكانی دەیانەوێت بە ئاشتی دەستاودەستی دەسەڵاتی لە ڕێی سندوقەكانی دەنگدانەوە تێدا بكرێت. 

سودانی وتیشی: لەمڕۆدا لەسەر لوتكەی قۆناغێكی گرنگین و بۆ پەیڕەوكردنی مافیكی دەستوری وەستاوین، كە مافی هەڵبژاردنی ئەو كەسانەیە كە نوێنەرایەتیتان دەكەن. 

سبەینێ‌ هەڵمەتی بانگەشەى هەڵبژاردن دەوەستێت و بێدەنگی هەڵبژاردن باڵ بەسەر عێراقدا بكێشێت، هاوكات بڕیارە ڕۆژی یەكشەممە زیاتر لە ملیۆنێك و 313 هەزار و 980 سەرباز و ئەندامی هێزە ئەمنییەكان و ئاوارەكان بۆ دەنگدانی تایبەت ڕوو لە سندوقەكانی دەنگدان بكەن، هەروەها ڕۆژی سێشەممەش دەنگدانی گشتیی بۆ خولی شەشەمی پەرلەمانی عێراق لە دوای ساڵی 2003ەوە بەڕێوە بچێت.