ئەنجوومەنی پیرانى ئەمریكا نەیتوانی كۆتایی بە درێژترین داخستنی حكومەت لە مێژوودا بهێنێت

پەیام 

ئەنجومەنی پیرانی ئەمریكا لە تێپەڕاندنی پڕۆژەیاسای بودجە بۆ كۆتاییهێنان بە درێژترین داخستنی حكومەت لە مێژووی ویلایەتە یەكگرتووەكاندا شكستی هێنا.

شكستی تێپەڕاندنی پڕۆژەیاساكە دوای ئەوە هات، 53 ئەندام دەنگیان لەسەر دا و 43 ئەندام دژی بوون، لە كاتێكدا بۆ پەسەندكردنی پێویستی بە 60 دەنگ لە كۆی 100 ئەندامی ئەنجومەنەكە هەبوو.

زۆربەی ئەندامانی پارتی دیموكرات دژی پڕۆژەیاساكە دەنگیان دا، بەو پێیەی دەسەڵاتێكی فراوان بە دۆناڵد ترەمپی سەرۆكی ئەمریكا دەدات، بە جۆرێك ڕێگەی پێدەدات مووچەی ژمارەیەك لە كارمەندانی حكومەت ڕابگرێت.

پێشتر ترەمپ لە بەیاننامەیەكدا داوای لە ئەندامانی كۆماریی ئەنجوومەنی پیران كردبوو واز لە یاریكردن لەگەڵ دیموكراتە چەپە توندڕەوەكان بهێنن، هەروەها جەختی لەوە كردبووەوە "كاتی ئەوە هاتووە كۆتایی بە سیاسەتی پەكخستن بهێنرێت و وڵاتەكە دەستبەجێ بكرێتەوە".

سێشەممەی هەفتەی ڕابردووش بۆ چواردەهەمین جار ئەنجوومەنی پیرانی ئەمریكا لە تێپەڕاندنی پڕۆژەیاسای كاتیی بودجە شكستی هێنا و ئەو كات 54 ئەندامی ئەنجوومەنەكە بە بەڵێ و 44 بە نەخێر دەنگیان بە پڕۆژەیاساكە دا، لەو ڕۆژەشەوە داخستنی حكومیی لە ئەمریكا چووە درێژترین ماوەی لە مێژوودا.