لە دوای ئاگربەستەوە 241 غــ.ەززەیی بەهۆی هێرشەكانی ئـ.یسرائیلەوە شەهید بوون

پەیام 

بەهۆی هێرشەكانی قەوارەی زایۆنییەوە، لە دوای ئاگربەستەوە لە كەرتی غەززە، 241 كەس شەهید بوون.

وەزارەتی تەندروستی فەڵەستین لە غەززە، لە ڕاگەیاندراوێكدا نوێترین زانیاری سەبارەت بە قوربانییانی هێرشەكانی قەوارەی زایۆنی، سەرەڕای ئاگربەست لە غەززە، بڵاو كردەوە.

وەزارەتەكە ڕایگەیاندووە: لە 72 كاتژمێری ڕابردوودا 10 تەرم گەیەنراونەتە نەخۆشخانەكانی غەززە كە نۆیان لەژێر دارپەردووی بینا ڕووخاوەكان دەرهێنراون.

لە ڕاگەیاندراوەكەدا هاتووە: لە دەستپێكی ئاگربەستەوە لە كەرتی غەززە، 241 كەس شەهید بوون و 614 فەڵەستینیش بریندار بوون و تەرمی 522 كەسیش لە ژێر داروپەردووی بیناكان دەرهێنراون.

بەپێی ڕاگەیاندراوەكەی تەندروستی غەززە، ژمارەی ئەو كەسانەی لە ڕۆژی 7ی ئۆكتۆبەری 2023وە تائێستا، بەهۆی هێرشەكانی سوپای زایۆنییەوە لە كەرتی غەززە شەهید بوون، گەیشتووەتە 69 هەزار و 169 كەس، ژمارەی بریندارەكانیش بۆ 170 هەزار و 685 كەس بەرز بووەتەوە.

لە 10ی مانگی ڕابردووشەوە، لەسەر بنەمای پلانی دۆناڵد تڕەمپ سەرۆكی ئەمریكا، لەنێوان سوپای قەوارەی زایۆنی و بزووتنەوەی حەماس ئاگربەست ڕاگەیەنرا، سەرەڕای بوونی ئەم بڕیارەش ناوە ناوە هێرشەكانی سوپای زایۆنی بە بیانووی جۆراوجۆر بەردەوامە.