كۆمسیۆن: تا پەسەندكردنی ئەنجامەكان دوورخستنەوەی كاندیدەكان بەردەوام دەبێت

پەیام 

كۆمسیۆنی هەڵبژاردنەكان ڕایدەگەیەنێت: دوورخستنەوەی كاندیدەكان بەردەوام دەبێت تا ئەو كاتەی دادگای فیدراڵی ئەنجامەكانی هەڵبژاردن پەسەند دەكات.

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عێراق ڕایدەگەیەنێت: ئێمە لایەنێك نین لە دوورخستنەوەی كاندیدەكان، بەڵكو تەنیا لایەنێكی ڕێكخەرین بۆ پڕۆسەی هەڵبژاردن.

ئاماژەی بەوەش كرد "سەرجەم زانیارییەكانی كاندیدەكان بۆ لایەنە پەیوەندیدارەكانی پشكنین دەنێردرێن، كە بریتین لە دەستەی لێپرسینەوە و دادپەروەری، دەستەی نەزاهە، دەزگای دژەتیرۆر، وەزارەتەكانی ناوخۆ و بەرگری،  پەروەردە و خوێندنی باڵا و پێشمەرگە، دەستەی حەشدی شەعبی، دەزگای ئاسایشی نیشتمانی و ئەنجوومەنی باڵای دادوەری". جومانە غەلای دەشڵێت: كۆمسیۆن لەسەر بنەمای زانیارییەكانی ئەو لایەنانە كاندیدەكان دوور دەخاتەوە.

دووپاتیشی كردەوە: بڕیاری كۆمسیۆن كۆتایی نییە، بەڵكو لە ماوەی سێ ڕۆژدا لە بڵاوكردنەوەی لە ماڵپەڕی فەرمی، مافی تانەلێدانی لە بەردەم دەستەی دادوەری هەیە، بەڵام بڕیاری دەستەی دادوەری بۆ سەرجەم لایەنەكان یەكلاكەرەوە و پابەندكەرە.

قسەكانی وتەبێژی كۆمسیۆنی هەڵبژاردنەكان لەكاتێكدایە ڕوانگەی عێراقی بۆ مافەكانی مرۆڤ ڕایگەیاند: بڕیارەكانی كۆمسیۆن تایبەت بە دوورخستنەوەی ژمارەیەك كاندید دوابەدوای ڕاگەیاندنی لیستی كۆتایی مایەی دڵەڕاوكێ و پێویستی بە ڕوونكردنەوەی یاسایی و شەفافییەتە.