ساڵانە نزیکەى 60 هەزار كەس لە ئێران بەهۆى پیسبوونی هەواوە گیانلەدەستدەدەن

پەیام 

بە پێی ڕاپۆرتێكی وەزارەتی تەندروستیی ئێران پیسبوونی هەوا ساڵانە 58 هەزار كەس لەو وڵاتە دەكوژێت و زیانی 17 ملیار دۆلاریی لێ دەكەوێتەوە.

عەلی ڕەزا ڕەئیسی، یاریدەدەری وەزیری تەندروستی ڕایگەیاند: پیسبوونی هەوا لە وڵاتدا بووەتە هۆی كارەساتێكی گەورەی مرۆیی و ئابووری، بە شێوەیەك ساڵانە نزیكەی 58 هەزار كەس گیانلەدەستدەدەن. 

بەپێی ڕاپۆرتەكە تێكڕای ڕۆژانە 161 حاڵەتی گیانلەدەستدانە، زۆربەیان بەهۆی نەخۆشییەكانی دڵ، سییەكان و شێرپەنجەوە بوون كە ڕاستەوخۆ بەهۆی هەناسەدانی بەردەوامی بە ماددە وردیلەكانی نێو هەواوە سەرچاوە دەگرن، لەسەر ئاستی ئابوورییش، وەزارەتەكە ئاشكراشی كردووە: پیسبوونی هەوا ساڵانە زیانی زیاتر لە 17 ملیار دۆلاری لێ كەوتووەتەوە.

ڕاپۆرتەكە جەخت لەسەر بڵاویی مەترسییەكە دەكاتەوە و ئاماژە بەوە دەكات كە هەموو دانیشتووانی شارەكانی ئێران لە ئاستی پیسبوونێكدا دەژین كە لە ڕێنماییەكانی ڕێكخراوی تەندروستیی جیهانی زیاترە.

لە ڕووی جوگرافییەوە، شاری ئەهواز بە پیسترین شاری ئێران دادەنرێت، دوای ئەویش ئەسفەهان، تاران، ئەراك پاشان كەرەج دێن، لە كاتێكدا سنە و ڕەشت بە پاكترین شارەكانی ئێران دەستنیشان كراون.

لە كۆتاییدا، عەلی ڕەزا ڕەئیسی، یاریدەدەری وەزیری تەندروستی، داوای كردووە "ڕێوشوێنی بەپەلە بۆ كەمكردنەوەی پیسبوونی هەوا، بە مەبەستی پاراستنی تەندروستی گشتی و ئابووری نیشتمانی، بگیرێتە بەر".