گواردیۆلا جارێکی دیکە پشتگیری بۆ فەڵەستین دووپات دەکاتەوە

پەیام سپۆڕت - مەڕوان تاڵیب

پێپ گواردیۆلای ڕاهێنەری مانچستەر سیتی جارێکی دیکە پشتگیری بۆ فەڵەستین دووپات دەکاتەوە و ڕایگەیاند، ئەوەی ڕوویداوە لەوێ هەرگیز قەرەبوو ناکرێتەوە.

 لە نوێترین چاوپێکەوتنی ڕۆژنامەوانیدا، سەرەتا ڕاهێنەرە ئیسپانییەکە وتی: گەلی فەڵەستین تاوانبار نییە کە لەوێ لەدایکبوون، هەموومان ڕێگەمان بە قەوارەی زایۆنی داوە کە گەلێکی تەواو لە ناو ببات و زیانەکان زۆرن و هەرگیز قەرەبوو ناکرێنەوە و من هیچ کەسێک نابینم بتوانێت بەرگری لە کۆمەڵکوژییەکانی غەززە بکات.

لە بەشێکی دیکەی قسەکانی گواردیۆلا دەشڵێت: دەکرا منداڵەکانی ئێمەش لەوێ بوونایە و بکوژرێن تەنیا لەبەر ئەوەی لەوێ لەدایک بوون، هەربۆیە جیهان وازی لە فەڵەستین هێناوە و ئێمە بە هیچ شێوەیەک هیچمان نەکردووە، هەربۆیە متمانەیەکی کەمم بە بەرپرسەکان هەیە هەموو شتێک دەکەن بۆ ئەوەی لە دەسەڵاتدا بمێننەوە.

لە کۆتایدا گواردیۆلا باسی لەوەکرد، ئەنجامدانی یاریی فەڵەستین و کەتەلۆنیا زیاتر ڕەمزییە نەوەک یارییەکی وەرزشی و لەم ڕێگەیەوە فەڵەستینییەکان بۆیان دەردەکەوێت کە بەشێک لە جیهان بیریان لێدەکاتەوە و هێماسازی یارمەتیدەرە بۆ بەرزکردنەوەی ئاستی هۆشیاری.