سەرۆكی پێشووی بەڕازیل بە تۆمەتی هەوڵی كودەتا دەستگیركرا

پەیام 

بە مەبەستی جێبەجێكردنی سزای 27 ساڵ زیندانی، سەرۆكی پێشووی بەڕازیل دەستگیر كرا.

بەپێی هەواڵی میدیاكان، زۆرینەی دادوەرانی دادگای باڵای بەرازیل بڕیاریان داوە ئەو تانەیە ڕەت بكەنەوە كە جاییر پۆڵسونارۆ، سەرۆكی پێشووی بەڕازیل دژی بریاری سزادانی بۆ ماوەی 27 ساڵ زیندانی  پێشكەش بە دادگای كردبوو.

دوای بڕیاری دادگای باڵا، پۆلیسی بەڕازیل پۆڵسونارۆی دەستگیر كرد و بڕیارە سزاكەی بەسەردا جێبەجێ بكرێت.

سەرۆكی بەرازیل لەنێوان ساڵانی 2019 بۆ 2023 تۆمەتی ئەوەی بەسەردا ساغ بووەتەوە كە لە هەڵبژاردنی سەرۆكایەتی 2022 هەوڵی داوە كودەتا ئەنجام بدات و لە دەسەڵاتدا بمێنێتەوە، بەڵام ئەو تەواوی تۆمەتەكانی ڕەت كردووەتەوە و وتیشی: نابێت سزاكەی بەسەردا بسەپێنرێت تا هەموو قۆناغەكانی تانە و پێداچوونەوە تەواو دەبێت.

دادگا تۆمەتی ئەوەشی داوەتە پاڵ كە پەیوەندیی بە گرووپێكی چەكداری تاوانكارییەوە كردووە، هەروەها هەوڵی داوە سیستمی دیموكراتی بەڕازیل بە هێز پەك بخات، دواجاریش هەوڵی داوە دۆناڵد ترەمپی سەرۆكی ئەمریكا دەستێوەردان لە دۆسیەكەیدا بكات، بەم تۆمەتانەش ماوەی سێ مانگە سەرۆكی پێشووی بەڕازیل لە ماڵەكەی خۆیدا دەستبەسەرە، پارێزەرەكانیشی دەڵێن: بەهۆی ئەوەی دۆخی تەندروستیی ناجێگیرە ئەگەری هەیە سزاكەشی هەر لەماڵەكەیدا بەسەر ببات.