خەمیس خەنجەر داوای كۆبوونەوەی فراكسیۆنەكانی سوننە دەكات

پەیام 

خەمیس خەنجەر، سەرۆكی هاوپەیمانیی سیادەی سوننی ڕایگەیاند: لە سۆنگەی گرنگیی یەكڕیزییەوە و هەوڵدان بۆ هاوهەڵوێستی كە داواكاریی و خواستی خەڵكی سوننەیە لە سەرجەم پارێزگاكان، داوا لە سەرۆكی هاوپەیمانی و حزبە سەركەوتووەكان دەكەم سبەی یەكشەممە كۆببینەوە و دەستكەوت و شایستەكانی قۆناغی داهاتوو تاوتوێ بكەین.

هاوپەیمانی سیادەی سوننی لە هەڵبژاردنی ئەنجوومەنی نوێنەراندا كە 11ی ئەم مانگە بەڕێوە چوو 14 كورسی بەدەست هێنا، ڕۆژی سێشەممەی ڕابردووش خەمیس خەنجەر ڕایگەیاند: ڕۆڵەكانی پێكهاتەی سوننی داوای دەوڵەتێكی دادپەروەر لە عێراق دەكەن و داوای باشكردنی دۆخی ئابوورییشی كرد.

لەلایەکیترەوە هەر ئەمرۆ لەگەڵ سەردانەكەی بۆ هەولێر، حزبی دەعوە نووری مالیكیی بۆ پۆستی سەرۆكوەزیرانی عێراق كاندید كرد.

ئەنجوومەنی شوورای حزبی دەعوەی ئیسلامیی عێراق بە كۆی دەنگ نووری مالیكی، ئەمینداریی گشتیی حزبەكەی بۆ پۆستی سەرۆكوەزیرانی داهاتوو پاڵاوت.

لەوبارەوە و لە ڕاگەیەنراوێكدا، حزبی دەعوە جەختی لە پاڵاوتنی مالیكی بۆ ئەو پۆستە كردەوە و ڕایگەیاند: مالیكی ئەزموون و توانای سەركردایەتییكردنی وڵاتی لەم قۆناغەدا هەیە كە پێویستی بە حوكمێكی دروست و هاوسەنگیی سیاسی هەیە.

بڕیارەكەی حزبی دەعوە هاوكاتە لەگەڵ سەردانی ئەمڕۆی ناوبراو بۆ هەرێمی كوردستان و كۆبوونەوەی لەگەڵ سەرۆك و جێگری سەرۆكی پارتی دیموكراتی كوردستان لەبارەی پێكهێنانی حكومەتی داهاتووی عێراقەوە.

نوری كامیل مالیكی تاكە كەسە كە دوو خول سەرۆكوەزیرانی عێراق بووە و لە ساڵی 2006 تا 2014 پۆستەكەی بەدەستەوە بووە، ئێستاش ڕكابەری سەرەكیی سوودانییە بۆ وەرگرتنەوەی كورسییەكە.