سودانی و مالیكی و شەتری بۆ پۆستی سەرۆكوەزیرانی عێراق کاندیدن

پەیام 

چوارچێوەی هەماهەنگی ناوی سێ پاڵێوراوى بۆ وەرگرتنی پۆستی سەرۆكوەزیرانی داهاتووی عێراق ئاشكراکرد، کە (سودانی و مالیكی و شەتری)ن، هەفتەی ئایندەش یەكێكیان بە دەنگدان یەكلایی دەكاتەوە.

سەرچاوەیەكی سیاسی ئاگادار پەردەی لەسەر ناوی سێ كاندیدی بەهێز بۆ وەرگرتنی پۆستی سەرۆكوەزیرانی عێراق لادا و ڕایگەیاند: بڕیارە هەفتەی داهاتوو جوڵەیەكی چڕی سیاسی لەنێوان سەرجەم هێزەكاندا بۆ یەكلاكردنەوەی هەر سێ سەرۆكایەتییەكە دەستپێبكات.

بەپێی زانیارییە ئاشكراوەكان، لەگەڵ بەردەوامیی كۆبوونەوەكان لەنێو "چوارچێوەی هەماهەنگی"، بەڵام میكانیزمی هەڵبژاردن بووەتە جێی مشتومڕ؛ بەشێك لە فراكسیۆنەكان لەگەڵ پەیڕەوكردنی نەریتی پێشوون، لەكاتێكدا فراكسیۆنەكانی دیكە پێداگری لەسەر پێوەری قورسایی هەڵبژاردن بۆ دیاریكردنی كاندیدەكان دەكەن.
سەرچاوەكە سێ ناوی دیاری وەك بەهێزترین كاندید ئاشكرا كردووە، كە بڕیارە لە ڕێگەی دەنگدانەوە لەنێو چوارچێوەكەدا یەكێكیان هەڵبژێردرێت، ئەوانیش بریتین لە: محەمەد شیاع سودانی، نوری مالیكی (سەرۆكی هاوپەیمانیی دەوڵەتی یاسا) و حەمید شەتری (سەرۆكی دەزگای هەواڵگری).

ئەوەش ڕوون كراوەتەوە، كە لیژنە پێكهێنراوەكانی چوارچێوەكە هاوكێشەكە زۆر ناگۆڕن و دواجار كاندیدەكە هەر لەنێو "ماڵی شیعە" و كەسایەتییەكی ناسراو دەبێت.