هۆشداریی ئاڵنگاریی مەترسیدار لە ڕووی ئابوورییەوە بە عێراق دەدرێت

پەیام

لە ڕاپۆرتێكیدا سەبارەت بە عێراق، ئاژانسی مۆدێز ڕایگەیاندووە: پشتبەستنی گەورەی عێراق بە كەرتی هایدرۆكاربۆن كە 90%ی داهاتی حكومەت پێكدەهێنێت وایكردووە لە گۆڕانكارییەكانی نرخی نەوتی خاودا لە پەراوێزدا بێت، بەتایبەت كە پێشبینیی دەكرێت بەراورد بە 2023 و 2025 نرخی نەوت لە ساڵانی 2026 ـ 2027 دابەزێت، ئەمەش بەپێی ڕاپۆرتەكەی ئەو ئاژانسە ئابوورییە وا دەكات فشارێكی زیادە لەسەر بودجە و توانای دەوڵەت لەسەر دابینكردنی خەرجییەكانی دروست بكات.

لە ڕووی سیاسییەوە، ئاژانسەكە پێشبینی دەكات هاوشێوەی هەڵبژاردنی 2021 هەمان سیناریۆی دواكەوتنی پێكهێنانی حكومەت و پەسەندكردنی بودجە  لە دوای هەڵبژاردنی ئەمساڵیشەوە دروست ببێتەوە و ئەمەش وڵات دەخاتە ئەگەری بۆشایی ئابوورییەوە.

سەرەڕای ئەم هۆشدارییدانە، ئاژانسی مۆدێز بۆ پۆڵێنی دڵنیایی ڕیزبەندیی درێژمەودای عێراقی بە دراوی نێوخۆیی و بیانی لە ئاستی (سی ئەی ئەی1)، بە پشتبەستن بە "بەهێزیی یەدەگی دراوی بیانی، سنوورداریی قەرزی دەرەكی" و چەند ڕەهەندێكی دیکە تێڕوانینی سەقامگیرییانەی بۆ داهاتووی ئابووریی عێراق هەیە.