24/11/2025
397 جار خوێنراوەتەوە
هەڕەشەی بڕینی مووچەی ئەو كەسانە دەكرێت كە (هەژماری من)یان پڕ نەكردووەوە
پەیام
وەزارەتی دارایی حكومەتی ماوەبەسەرچوو، هەڕەشەی بڕینی مووچەی ئەو كەسانە دەكات كە (هەژماری من)یان پڕ نەكردووەوە و دەڵێت: لە ساڵی نوێوە مووچەیان پێ نادرێت.
بەڕێوەبەرایەتیی گشتیی ژمێركاریی وەزارەتی دارایی و ئابووریی حكومەتی ماوەبەسەرچووی هەرێم، لە ڕاگەیەندراوێكدا دەڵێت "دووپاتی دەكەینەوە لە دوای سەری ساڵەوە، مووچە تەنیا لە ڕێی پڕۆژەی (هەژماری من)ـەوە خەرج دەكرێت و، هەر كەسێك بەشدار نەبێت لە پڕۆژەی هەژماری من، مووچە وەرناگرێت و خۆی بەرپرسیار دەبێت".
ئەم بڕیارەی حكومەتی ماوەبەسەرچوو لە كاتێكدایە كە بەرەو كۆتایی مانگی 11 دەڕۆین، بەڵام تا ئێستا نەیتوانیوە مووچەی مانگی نۆ بۆ مووچەخۆرانی دابین بكات.
وەزارەتەكە لەژێر پاساوی ڕێككەوتنەكان لەگەڵ حكومەتی فیدراڵی، دەیەوێت هەژماری من بەزۆر بەسەر ئەو مووچەخۆرانەدا بسەپێنێت، كە نایانەوێت مووچەی خۆیان بخەنە دەستی ئەو بانكانەی پرۆژەكە و هیچ متمانەیەكیان پێی نییە.
هەموو ئەمانە لە كاتێكدان وەزارەتی دارایی حكومەتی عێراق بە فەرمی دانی بە پرۆژەی هەژماری مندا نەناوە، بەڵكو داوای بەبانكیكردنی مووچەی مووچەخۆرانی هەرێم لە ڕێگەی بانە فیدراڵییەكانەوە دەكات، بەڵام حكومەتی ماوەبەسەرچووی هەرێم ئامادە نییە بڕیارەكە وەكوو خۆی جێبەجێ بكات و بەزۆر هەژماری من بەسەر مووچەخۆراندا دەسەپێنێت.
لە تۆڕە کۆمەڵایەتیەکان شەیری بکە