1 کاتژمێر پێش ئێستا
44 جار خوێنراوەتەوە
سەرۆكوەزیرانی عێراق سەرجەم هێزەكان لە ژێر دەسەڵاتی خۆیدا كۆدەكاتەوە
پەیام
سەرۆكوەزیرانی عێراق فەرماندەیی ئۆپڕاسیۆنە هاوبەشەكانی هەڵوەشاندەوە و سەرجەم جومگە ئەمنییەكان بە حەشدی شەعبی، دژەتیرۆر و دەستەی دەروازە سنوورییەكانیشەوە لەنێو یەك نووسینگەدا و لەژێر دەسەڵاتی خۆی كۆ كردەوە.
بەپێی فەرمانێكی دیوانیی كە عەلی فالح زەیدی سەرۆكوەزیران و فەرماندەی گشتیی هێزە چەكدارەكان دەری كردووە، لە 23ی تەممووزی 2026ـەوە فەرماندەیی ئۆپڕاسیۆنە هاوبەشەكان و نووسینگەی سكرتێری تایبەتی فەرماندەی گشتیی هەڵوەشێنراونەتەوە و ئەركەكانیان لەنێو پێكهاتەیەكی نوێ بە ناوی "نووسینگەی فەرماندەی گشتیی هێزە چەكدارەكان" یەك خراون.
ئەم نووسینگە نوێیە كە بارەگاكەی لە ناوچەی سەوزی بەغدادە، ڕاستەوخۆ لە لایەن سەرۆكوەزیرانەوە سەرپەرشتی دەكرێت و دەبێتە تاكە مەرجەعی باڵا بۆ سەرپەرشتی و بەدواداچوونی كارەكانی هەر دوو وەزارەتی بەرگری و ناوخۆ.
ئەم پێكهاتە نوێیەی حكوومەت سەرجەم دەزگا هەستیارەكان لەخۆ دەگرێت، لەوانە: دەزگای دژەتیرۆر، دەزگای هەواڵگریی نیشتمانی، ڕاوێژكاریی ئاسایشی نیشتمانی، دەستەی حەشدی شەعبی، دەستەی دەروازە سنوورییەكان و دەستەی پیشەسازیی جەنگی كە سەرجەمیان ڕاستەوخۆ بە نووسینگەی فەرماندەی گشتییەوە دەبەسترێنەوە.
بڕیارەكە جەخت لەوە دەكاتەوە سەرجەم یەكەكان لەمەودوا ڕاستەوخۆ لەژێر فەرمانی نووسینگەی فەرماندەی گشتیی هێزە چەكدارەكاندا كار دەكەن و هیچ لایەنێكی سەربازی لە دەرەوەی ئەم چوارچێوەیە نابێت.
لە تۆڕە کۆمەڵایەتیەکان شەیری بکە