سوپای ئیسـ*ـرائیل بۆردومانی شارۆچكەیەكی سووریایان كرد و ١٣ سووری كوژران

پەیام

بەیانیی ئەمڕۆ فڕۆكە جەنگییەكانی قەوارەی داگیركەری زایۆنی بۆردومانی شارۆچكەیەكیان لە باشووری سووریا كرد و، بەو هۆیەوە 13 سووری كوژران.

میدیا ناوخۆییەكانی سوریا و هەروەها قەوارەی داگیركەری زایۆنی ئەوەیان بڵاو كردەوە كە بەیانی زووی ئەمڕۆ بۆردومانی شارۆچكەی "بیت جن" لە نزیك بەرزاییەكانی جۆلان لە باشووری سووریا كراوە كە نزیكەی 10 كیلۆمەتر لە سنوورەكانی قەوارەی زایۆنییەوە دوورە.

ئەوە پشتڕاستكراوەتەوە كە لە بۆردومانەكەدا 13  سووری كوژراون، فڕۆكە جەنگییەكانی سوپای زایۆنی زیاد لە جارێك بۆردومانی شوێنەكەیان كردووە.

سوپای زایۆنی لە ڕاگەیەنراوێكدا دەڵێت، بۆردومانەكە دوای گەمارۆدانی یەكەیەكی سەربازی داگیركەر بووە كە چوونەتە شارۆچكە سوورییەكەوە و لەلایەن دانیشتوانی شارۆچكەكەوە گەمارۆدراون و تووشی پێكدادانی سەربازی بوون، لەو پێكدادانەشدا پێنج سەربازی زایۆنی برینداربوون.

دوای بۆردومان و پێكدادانە سەربازییەكان لە شارۆچكەی "بیت جن" زۆرینەی دانیشتوانەكەی ئاوارەبوون و ڕوویان لە ناوچەكانی دەورووبەر كردووە، سوپای زایۆنیش دەڵێت، سێ هاووڵاتی سوورییان دەستگیركردووە.

لەلایەكی دیكەوە، سوپای زایۆنی ڕایگەیاندووە، گرووپێكی جوولەكە بەناوی (رواد باشان) سنووری نێودەوڵەتی سووریایان تێپەڕاندووە و بانگەشەی دروستكردنی كۆمەڵگەی جوولەكەنشینیان لەناو خاكی سووریادا كردووە..