زیاترلە 82 هەزار سەربازی ئیسڕائیلی چارەسەری پزیشكی وەردەگرن

پەیام 


وەزارەتی بەرگریی قەوارەی زایۆنی دەڵێت، زیاترلە 82 هەزار سەربازی ئیسرائیلی لەژێر چارەسەری پزیشكیدان.

ڕۆژنامەی جۆرۆزالیم پۆستی ئیسرائیلی ئاماری وەزارەتەكەی بڵاو كردووەتەوە و تیایدا هاتووە، لە ئێستادا 82 هەزار و 400 سەربازی ئیسرائیلی چارەسەری پزیشكی وەردەگرن، لەسەدا 58 ی چارەخوازەكان پەیوەندیی بە كێشەی دەروونییەوە هەیە بەتایبەت شۆكبوونی كاتی جەنگ.

بەپێی ئاماری فەرمیی وەزارەتەكە، 22 هەزار ئەفسەر و سەرباز لە میانەی جەنگی كۆمەڵكوژیی سەر غەززەدا بریندار بوون. بەڵام گرووپە فەڵەستینییەكان و بەشێك لە میدیا جیهانییەكانیش باسیان لەوە كردووە ئاماری كوژراو و بریندارانی سوپای زایۆنی زۆر لەوە زیاترە كە دانی پێدا دەنێت.

وەزارەتی بەرگریی زایۆنی ڕاشیگەیاندووە، مانگانە نزیكەی هەزار و 500 داواكاریی دیكەیان بۆ دێت كە سەربازانن و دان بەوەدا دەنێن تووشی نەخۆشیی دەروونی بوون، پێشبینیشی كردووە تا ساڵی 2028 ڕێژەكە بگاتە 100 هەزار كەس.

جێی باسە ڕاپۆرتی ڕێكخراوە نێودەوڵەتییەكان چەندین جار بەڵگەی ئەوەیان خستووەتە ڕوو كە ئەفسەر و سەربازانی زایۆنی لە غەززە كاری دڕندانە و نامرۆڤانەیان ئەنجام داوە و بە ئەنقەست خەڵكی فەڵەستینییان كوشتووە و بریندار كردووە  و دەستدرێژیان كردوونەتە سەر.