ئەحمەد شەرع: ڕووبەڕووی هەموو بەربەستەكان دەبینەوە و سووریا بونیاد دەنێینەوە

پەیام

سەرۆككۆماری سووریا لە مزگەوتی ئەمەوی لە دیمەشق بەشداریی نوێژی بەیانی كرد و ڕایگەیاند: ڕووبەڕووی هەموو بەربەستەكان دەبنەوە و سووریا بونیاد دەنێنەوە.

سەرۆكایەتی كۆماریی سووریا لە هەژماری خۆی لە تۆڕی كۆمەڵایەتی ئێكس ئاماژەی بەوەداوە كە ئەمڕۆ دووشەممە، ئەحمەد شەرع دوای ئەنجامدانی نوێژی بەیانی لە مزگەوتی ئەمەوی، بە بۆنەی یەكەمین ساڵیادی ڕووخانی ڕژێمی بەشار ئەسەد وتارێكی  پێشكەش كردووە و ڕایگەیاندووە: "ڕووبەڕووی هەموو ئاستەنگ و بەربەستەكان دەبینەوە. 

ئەحمەد شەرع هەمان ئەو پۆشاكە سەربازییەی لەبەر بوو كە ساڵی ڕأبردوو لەكاتی چوونە ناو مزگەوتی ئەمەویدا لەبەری كردبوو، ڕاشیگەیاند: سووریا لە باكوور تا باشوور لە ڕۆژهەڵات تا ڕۆژئاوا، دووبارە، بونیاد دەنێنەوە.

هاوكات، ئاژانسی فەرمیی سووریا "سانا" بڵاوی كردەوە كە ئەحمەد شەرع لە میانی دیداری لەگەڵ ژمارەیەك كەسایەتی پارێزگای دیمەشق ئاماژەی بەوەداوە كە ئەركەكە بە ئازادكردنی دیمەشق كۆتایی نەهاتووە، بەڵكو ئێستا بەرپرسیارێتی هاوبەش كەوتووەتە سەر شانی هەمووان، بۆ درێژەدان بە دووبارە ئاوەدانكردنەوە و بنیاتنانەوەی سووریا.

ڕاشیگەیاندووە كە دیمەشق دوای ئازادكردنی، بووەتە شوێنێكی گرنگ و ستراتیجی، هەروەها پەیوەندییەكانی لەسەر ئاستی نێودەوڵەتیی پتەوتر كردووە.