"گەر مالیكی و سودانی سازش نەكەن بۆ یەكتر، كاندیدی جێگرەوە دێتە ئاراوە"

پەیام 

سەركردەیەكی دەوڵەتی یاسای نووری مالیكی رایگەیاند، لە نێو هێزە شیعییەكاندا تێكدان و پەرتبوون هێڵی سوورە و، بۆ پرسی كاندیدی سەرۆكوەزیرانیش پلانی بی ئامادەیە.

زیا ناسری، سەركردە لە دەوڵەتی یاسا كە لە لایەن نووری مالیكییەوە سەرۆكایەتی دەكرێت، رایگەیاند، كاندیدی بەهێز لە ئێستادا تەنها مالیكی و سوودانییەو هەردوو كاندید كێبڕكێ دەكەن و هێشتا كەسیان سازشیان بۆ ئەوی تریان نەكردووە.

ناسری دەشڵێت، لە نێو چوارچێوەی هەماهەنگیدا هیچ بژاردەیەكی لەو شێوەیە نییە كە عاساكە لەسەری یەكێك لە كاندیدەكاندا بشكێت و ئەوی تریان سەربكەوێت، بەڵكو لە دۆخی رێنەكەوتندا كاندیدێكی دیكە دەهێنرێتە پێشەوە.

بەپێی ئەوەی سەركردەكەی دەوڵەتی یاسا دەیڵێت، مالیكی بە ڕوونی ئەوەی راگەیاندووە، پلانی جێگرەوەی هەیە كە ڕازی كردنی سوودانی بە سازشكردن لە خۆ دەگرێت، لە نێویشیدا كاندیدكردنی كەسێكی دیكە بۆ پۆستی سەرۆكوەزیران، كە نە مالیكییە و نە سوودانی، كە دیارترین ئەو كاندیدە جێگرەوانەش لە ئێستادا بریتییە لە حەمید شەتری، سەرۆكی دەزگای هەواڵگری و قاسم ئەعرەجی، ڕاوێژكاری ئاسایشی نیشتیمانی.