بەهۆی نەبوونی كارەباوە لە سنووری بادینان خۆپیشاندان بەڕێوە چوو

پەیام

بەهۆی كێشەی كارەباوە، لە ناوچەیەكی سنووری بادینان خۆپیشاندان بەڕێوە چوو و ڕێگایەكی سەرەكی داخرا.

شەوی ڕابردوو لە کۆمەڵگەی قەدش-ی سنووری ئامێدی لە پارێزگای دهۆك، هاووڵاتیان دژی كەمیی كاتەكانی پێدانی كارەبا ڕژانە سەر شەقام و ناڕەزاییان دەربڕی.
لە خۆپیشاندانەكەدا هاووڵاتیان بە سووتاندنی تایە  ناڕەزاییان نیشاندا و ڕیگەی سەرەكی نێوان ئامێدی دهۆكیان بە ڕووی ئۆتۆمبێلەكاندا داخست و  هاتوچۆیان پەكخست.

خۆپیشاندەران دەڵێن بڕی پێویستی كارەبایان بۆ دابین نەكراوە، داوای چارەسەركردنی كێشەكانیان دەكەن و هۆشداری لە بەردەوامی فشارەكانیان گەیشتنیان بە ئەنجام دەدەن.

قەدش كۆمەڵگەیەكە لە نێوان قەزای ئامێدی و پارێزگای دهۆك هەڵكەوتووە، كەوتووەتە سەر ڕێگەی سەرەكی نێوان دهۆك و ئیدارەی سەربەخۆی سۆران و بەشێك لە ناوچەكانی بادینان، لە ڕابردوویشدا چەندین جار بەهۆی نەبوونی خزمەتگوزارییەكانەوە ناڕەزاییان دەربڕیوە و لەلایەن بەرپرسانەوە بەڵێنی چارەسەرییان پێ دراوە، بەڵام وەك خۆیان دەڵێن: بەڵێنەكان نەبراونەتە سەر و جێبەجێ نەكراون.