ئەفسەرێکى پۆلیسى کەرکووک کوژرا و دواتر بکوژەکەى دەستگیرکرا

پەیام 

لە ڕووداوێكی تەقەكردندا لە كەركووك بەڕێوەبەری پێشووی بنكەی پۆلیسی عەرەفە كوژرا و تەقەكەرەكەیش دەستگیر كرا.

ئەمڕۆ لە باكووری پارێزگای كەركووك عەقید زەید عادل سەبیح جەرجیس كە لە پێكهاتەی مەسیحی بووە و لە ڕابردوودا وەك بەڕێوەبەری بنكەی پۆلیسی عەرەفە و چەند پۆستێكی دیكەی ئەمنی خزمەتی كردووە، لەلایەن چەكدارێكی نەناسراوە دەستڕێژی گوللەی لێ كرا و بەهۆیەوە گیانی لەدەست دا.

بەپێی ئەو گرتە زیدیۆییەی كە لە كامێرای چاودێرییەوە تۆمار كراوە، ئەو ئەفسەرە لە بەردەم  ماڵەكەیدا دەپێكرێت و بەچەند گوللەیەك بەر بەشی سەرەوەی جەستەی دەكەوێت و پاشان تەقەكەرەكە بەجێی دەهێڵێت و عەقیدە پێكراوەكەیش شوێنی ڕووداوەكە بە برینداری و بە ڕاكردن بەجێدەهێڵێت.

بەپێی زانیاری سەرچاوە پزیشكییەكان ئەفسەرەكە بۆ نەخۆشخانە گواستراوەتەوە بەڵام بەهۆی سەختی برینەكەیەوە گیانی لەدەست داوە.

هاوكات پۆلیسی كەركووك دوای كوژرانی ئەفەسەرەكەی ڕاگەیاند و ئاشكراشیكرد كە شۆفێری ئەو ئۆتۆمبێلەی كە هێرشەكەی پێ ئەنجام دراوە بە كوژراوی لە ڕێگەی تازە ـ كەركووك دۆزراوەوە تەوە و دواتریش دەستگیركردنی تەقەكەرەكەی ڕاگەیاند و لە ئێستادا لایان دەستبەسەرە.

لای خۆیەوە عەبدولائەمیر شەمەری وەزیری ناوخۆی عێراق پێكهێنانی لیژنەیەكی لێكۆڵینەوەی بۆ تاوانەكە ڕاگەیاند بۆ بەدواچوونی ئەو كەسانەی كە هێرشەكەیان ئەنجامداوە یان لە پشت ڕووداوەكەوە بوون.