بەرپرسێكی سووریا: دانوستانەكانمان لەگەڵ هەسەدە هیچ دەرئەنجامێكی نەبووە

پەیام 

بەرپرسێكی سووریا ڕایدەگەیەنێت دانوستانەكانیان لەگەڵ هەسەدە تا ئێستا هیچ دەرئەنجامێكی نەبووە و ئەوەی دەوترێت جێبەجێ ناكرێت.

ئاژانسی هەواڵی فەڕمی سووریا سانا لە زاری سەرچاوەیەكەوە لە وەزارەتی دەرەوەی سووریا بڵاوی كردووەتەوە، كە لێدوانەكان سەبارەت بە تێكەڵكردنی دامەزراوەكانی ناوچەكە بە دامەزراوەكانی دەوڵەت، تا ئێستا تەنیا لە ئاستی تیۆریدا ماونەتەوە و هیچ هەنگاوێكی كردەیی یان خشتەیەكی كاتیی ڕوون نەخراوەتەڕوو.
سەرچاوەكە ئاماژەی بەوە كرد، بوونی دامەزراوەى كارگێڕی، ئەمنی و سەربازییەكان كە بە شێوەیەكی سەربەخۆ و لە دەرەوەی چوارچێوەی دەوڵەت بەڕێوە دەبرێن لە باكووری ڕۆژهەڵاتی سووریا، لەگەڵ بانگەشەی یەكگرتوویی ناگونجێت، ئەمەش لە بری چارەسەركردن دابەشبوونەكە قووڵتر دەكاتەوە.

ئەوەیشی خستەڕوو، سەرەڕای لێدوانەكانی هێزەكانی سووریای دیموكرات "هەسەدە" سەبارەت بە بەردەوامی گفتوگۆ لەگەڵ حكوومەتی دیمەشق، بەڵام لە ئەرزی واقعدا هیچ ئەنجامێكی بەرجەستەی نەبووە و، لێدوانەكان زیاتر مەبەستی ڕاگەیاندنیان هەیە و بۆ كەمكردنەوەی گوشارە سیاسییەكانن.

سەبارەت بە پرسی نەوت، سەرچاوەكە بە سانای ڕاگەیاندووە، لێدوانەكانی هەسەدە كە دەڵێت: "نەوت موڵكی هەموو سوورییەكانە" جێی باوەڕ نییە، چونكە نەوتەكە لە ڕێگەی دامەزراوەكانی دەوڵەتەوە بەڕێوە نابرێت و داهاتەكەشی ناچێتە بوودجەی گشتییەوە.