باكووری كوردستان.. بەهۆی بەفرەوە ڕێگەی 1644 ناوچەی نیشتەجێبوون داخراوە

پەیام 

لە پارێزگاكانی وان، هەكاری، مووش و بەدلیسیش لە باكووری كوردستان ڕێگای 1644 ناوچەی نیشتەجێبوون بەهۆی بەفرەوە داخراون.

لە شاری ناوەندی پارێزگای (وان) ڕێگای 625 ناوچە داخراوە و تیمەكانی شارەوانی لە كاركردن بۆ كردنەوەی ڕێگاكان و پاككردنەوەی شەقام و شۆستەكان لە بەفر بەردەوامن.

لە قەزای ئەرجیش بەهۆی زۆریی بەفرەوە خانووە یەكنهۆمییەكان و ئۆتۆمبێلە ڕاگیراوەكان بە بەفر داپۆشراون و سەرمایەكی تووند ناوچەكەی گرتووەتەوە.

بارینی بەفر لە (هەكاری) كە لە هەندێك شوێن بەرزییەكەی گەیشتووەتە دوو مەتر، ژیانی ڕۆژانەی هاووڵاتیانی پەك خستووە و بەهۆیەوە 357 ڕێگای نیشتەجێبوون داخراون.

زۆرێك لە ئۆتۆمبێلەكان و خانووە یەك نهۆمییەكان بەتەواوی بە بەفر داپۆشراون و هاووڵاتیان سەرقاڵی ڕاماڵینی بەفری سەربانەكانیانن.

لە پارێزگای بەدلیس، بەهۆی بارینی بەفری زۆر و كڕێوە، ڕێگای 294 گوند بە ڕووی هاتوچۆدا داخراون.

(ئومیت كورتكان) بەرپرسی ڕێگاوبانی پارێزگای بەدلیس، ڕایگەیاند: تیمەكانمان بێوچان كار بۆ كردنەوەی ڕێگاكان و ڕێگریی لە پەككەوتنی هاتوچۆ دەكەن.

بارینی بەفر و كڕێوە لە پارێزگای (مووش)یش بەردەوامە و بەهۆیەوە ڕێگای 368 ناوچەی نیشتەجێبوون بە ڕووی هاتوچۆدا داخراوە.