پارتە سیاسییەكانی گرینلاند ڕەتیدەكەنەوە بیانەوێت ببن بە هاووڵاتیی ئەمریكی

پەیام 

پارتە سیاسییەكانی گرینلاند بە یەك دەنگ ڕەتی دەكەنەوە بیانەوێت ببن بە هاووڵاتیی ئەمریكی.

پێنج پارتە سیاسییەكەی پەرلەمانی گرینلاند لە ڕاگەیەنراوێكدا یەكگرتووی خۆیان لە بەرانبەر هەوڵەكانی دۆناڵد ترەمپ سەرۆكی ئەمریكا بۆ دەستبەسەرداگرتنی وڵاتەكەیان ئاشكرا كرد و  ڕەتیانكردەوە ببن بە بەشێك لە وڵاتانی دیكە و ڕایانگەیاند "نایانەوێت ببن بە ئەمریكی یان دانیماركی بەڵكو دەیانەوێت ببن بە گرینلاندی".
ئەو پێنج پارتە داوایان ئەمریكا كردووە كۆتایی بە سوكایەتی بە وڵاتەكەیان بهێنێت و جەختیان لەسەر ئەوە كردەوە، كە داهاتووی گرینلاند دەبێت لەلایەن گرینلاندەكانەوە بڕیاری لەسەر بدرێت.

ئەم هەنگاوەی پارتە سیاسییەكانی گرینلاند دوای لێدوانەكانی ترەمپ هات كە لە ڕۆژی هەینی بەكاتی ئەمریكا بڵاوبووە و ڕایگەیاند، لەبارەی دۆسیەی گرینلاندەوە شتێك دەكات و بەپێویستی زانی كۆنترۆڵی دورگەكە بگرنە دەست، ئەوەیشی بۆ ڕێگریكردن لە جوڵەی چین و ڕووسیا بۆ كۆنترۆڵكردنی ئەو دورگە گرنگە گەڕاندەوە، كە دەكەوێتە جەمسەری باكوور و لەلایەن دانیماركەوە كە ئەندامی ناتۆیە بەڕێوە دەبرێت.