دیمەشق مۆڵەتی چوار ڕۆژ دەداتە مەزڵوم عەبدی بۆ یەكلاكردنەوەی ڕێككەوتنی ڕۆژاوای كوردستان

پەیام

ئیبراهیم عەلەبی، نوێنەری هەمیشەیی سووریا لە نەتەوە یەكگرتووەكان ڕایگەیاند، شاندی حكومەتی سووریا مۆڵەتێكی دیاریكراوی كە لە چوار ڕۆژ تێپەڕ ناكات داوەتە مەزڵوم عەبدی، بۆ وەڵامدانەوە و دەربڕینی ڕەزامەندی لەسەر خاڵەكانی ڕێككەوتنە نێودەوڵەتییەكە سەبارەت بە یەكلاییكردنەوەی دۆخی ڕۆژاوای كوردستان.

عەلەبی لە میانی وتەیەكیدا لە ئەنجوومەنی ئاسایشی نێودەوڵەتی ئاماژەی بەوە كرد كە وەڵامی سەرەتاییان پێگەیشتووە، بەڵام هێشتا چەند خاڵێك لەلایەن بەرامبەرەوە پەسەند نەكراون، بۆیە داوای لە عەبدی كرد هەڵوێستەكان ڕوون بكاتەوە و پابەند بێت بەو خاڵانەی لەگەڵ نەتەوە یەكگرتووەكان و وڵاتانی گرەنتیكاردا لەسەری ڕێككەوتوون.

ڕێككەوتنەكە ڕێوشوێنی ئەمنی و سیاسی بۆ كەمكردنەوەی گرژی و گەڕاندنەوەی سەقامگیری لەخۆدەگرێت، ناوبراو هۆشداریشی دا كە هەر دواكەوتنێك لە قبوڵكردنی بەندەكان دەبێتە هۆی پەكخستنی ڕەوتی دانوستانەكان.

لە كۆتاییدا نوێنەرەكەی سووریا جەختی كردەوە كە حكومەت هەوڵی تێكەڵكردنەوەی ئەندامانی هەسەدە دەدات لەگەڵ سوپا و دەوڵەتی سووریا.

ڕوونیشیكردەوە كە هێزە حكومییەكان ناچنە ناو شارە كوردییەكان، لەو ناوچانەدا تەنها پشت بە هێزە ئەمنییە ناوخۆییەكان دەبەسترێت.