مەزڵوم عەبدی: بە هەموو توانامانەوە و بەجددی كار بۆ پاراستنی ئاگربەست دەکەین

پەیام  

فەرماندەی گشتیی هێزەكانی سووریای دیموكرات ڕایدەگەیەنێت: بە هەموو توانامانەوە و بەجددی كار بۆ پاراستنی ئاگربەست دەکەین.

دوابەدوای كۆبوونەوەی لەگەڵ هەریەك لە تۆم باراك نێردەی تایبەتی سەرۆكی ئەمریكا و براد كۆپەر فەرماندەی فەرماندەیی ناوەندیی هێزەكانی ئەمریكا لە هەرێمی كوردستان، مەزڵوم عەبدی فەرماندەی گشتیی هێزەكانی سووریای دیموكرات ڕایگەیاند: پاڵپشتیی ئەمریكا و سیاسەتی سەرۆكی ئەو وڵاتە بۆ پڕۆسەی ئاگربەست، هەروەها هەوڵەكانی باڵیۆز تۆم باراك بۆ گەڕانەوە بۆ گفتوگۆ و دانوستان لەنێوان ئێمە و حكومەتی سووریا پرسێكی جددی و گرنگ و جێی پێزانینە.

لە نووسراوێكیدا لە ئەژماری خۆی لە تۆڕی ئێكس، مەزڵوم عەبدی ئەوەشی نووسیوە كە "ئێمە بە جددی و بەوپەڕی توانامانەوە هەوڵ بۆ تێكەڵبوونی ڕاستەقینەی هێزەكانمان و پاراستنی ئەو ئاگربەستەی ئێستا بەركارە دەدەین".

بەپێی زانیارییەكان دوابەدوای كۆبوونەوەی لەگەڵ فەرماندەی هەسەدە، براد كۆپەر فەرماندەی فەرماندەیی ناوەندیی هێزەكانی ئەمریكا بە مەبەستی چاودێرییكردنی ڕێككەوتنی ئاگربەست سەردانی سووریای كردووە.